【春嬌救志明．有片】余文樂壓軸甩Key唱神曲 觀眾笑爆一聽再聽
上畫4日的《春嬌救志明》，票房已衝破950萬，過了勞動節假期肯定過千萬，氣勢強勁。不少觀眾睇完，都大讚今集情節感人，笑料夠多又夠爆，尤其壓軸張志明在中環海濱搞場大龍鳳求婚，唱埋惡搞版《春嬌救志明》，觀眾都笑到收唔到聲，繼而投訴因為太好笑，而在戲院根本聽唔到歌詞。眼見大家都好想再聽志明唱歌，電影公司徇眾要求，昨晚將這首惡搞求婚歌精華版放上網，等大家邊學邊唱，至於想睇足本，當然要買飛再入場啦！未睇電影的朋友，可以先學定到時入場一齊大合唱︰「余春嬌打救張志明 打救咗佢整個生命～」
電影上畫至今，都獲不少正評，情節對白一貫地抵死嘴賤，但最獲觀眾欣賞竟然係余文樂的歌聲。話說電影中段，志明激嬲春嬌，春嬌差不多把心一橫要分手，不過志明決定力挽狂瀾，繼上集惡搞《別問我是誰》後，今次玩更大，將五月天首《春嬌救志明》來個廣東版，仲要係全口語的廣東版，唱出7年來二人經歷過的所有溫馨事情，由相約在漫春天、玩乾冰、扮王馨平都一一入詞，句句過癮之餘又感動，結果聽到春嬌心軟，不單冇再嬲志明，還決定嫁俾佢。
原來首歌是由林日曦填詞，難怪咁有「勁曲金曲」味道，既甩甩地Key，又會唔啱音，不過負責唱的余文樂，就覺得歌詞的「甩咳」正俱備張志明的特質。問到拍攝時要即場演繹有冇壓力？樂仔表示不單止冇，還好Enjoy。「我只是怕入錄音室，現場唱我冇問題，反而擔心拍攝期間被途人拍下然後放上網，不過拍到這一幕時已經是清晨4點幾，天氣又凍，途人都走晒。」
唱的盡情享受，聽的也欣然接受，千嬅就大表感動︰「因為林日曦將頭兩集發生過的精髓填入詞，令首歌好有畫面，相信個個女人聽完都會好感動。」首歌反應咁好，曾經是歌手的余文樂，有冇想過強勢回歸？「完全冇啦！你知道我為什麼一直在拍戲冇再返回樂壇，因為我好清楚自己好適合拍戲和好不適合唱歌。加上真的有錄音室恐懼症，都是做演員較自在。」唔入錄音室，可以淨唱live，做個演唱會歌手都得喎。