廉政狙擊｜陳展鵬深沉眼神忠奸難辨騷視帝級演技　可惜下場超洋葱

由邵氏兄弟及優酷出品的劇集《廉政狙擊》即將大結局，劇情高潮迭起，最大驚喜是Martin並非一個人，今晚（22日）一集更將會開始陸續現真身，除了之前已經露出馬腳的黎主任（胡渭康飾）之外，只在劇集開頭及中段約略出過場的陳展鵬亦驚爆是其中一員。陳展鵬飾演的O記總警司畢Sir，原來與卓廷光（黃智賢飾）有著一段不為人知的悲慘過去，二人互相扶持及幫助下才捱過困境走到今天，既是摯友亦是戰友，關係匪淺。

在劇組率先發布的預告宣傳照中，今晚及明晚陳展鵬將大晒視帝功架，憑藉幾個眼神及微表情，細緻演繹出盤算、陰險及沉著應戰等多種不同心理狀態，尤其面對廷光試探是否「二五仔」時，他自若而又帶點擔憂的眼神，配以一句義氣對白：「冇你就冇我，點還都還唔晒」更是搶戲。不過畢Sir真實並非如表面一樣見利忘義，他在超危急關頭將扶助前下屬繼明（王浩信飾）一把，並換來超洋蔥下場！

此外，劇組還率先曝光了第24集羅霖（Candy）及高鈞賢跳海場口的拍攝花絮。在第24集出現的「羅霖跳海搵仔」場口，雖然只有約兩分鐘，但拍攝時間卻長達大半天，除了因為要拍完近鏡拍Wide shot、兼要上水落水外，還因為拍攝現場十分大風！根據官方發布的拍攝花絮，羅霖、黃智賢（Ben）及高鈞賢身處搖晃不斷的遊艇上相當辛苦，頭髮亂了之餘羅霖更一度辛苦至苦笑，至於Ben則不停搞爛gag自我振作。三人之中，以高鈞賢穩定性最高，不但對於船隻搖擺不停零反應，不用埋位期間更只靠「馬步」站穩整個人，然後全程低頭極速覆message！

被問到為何如此「神乎其技」時，高鈞賢笑言：「我由細到大都係玩冰上曲棍球，同埋我識滑雪架嘛，加上我有其他業務，依家又做緊自己嘅服裝品牌，所以覆message係好緊要嘅。因為場戲我唔係好多對白，最緊要係安全救到阿媽，同埋好認真咁跳落海度。」談到該場落水戲，高鈞賢感激劇組貼心安排：「佢哋安排得好好，我記得以前拍過一次落海戲，嗰時踩咗十五分鐘水，但係冇救生員傍住，嗰時喺海度飄吓飄吓，我會有好多幻想，會諗有鯊魚或突然抽筋點算。但《廉政》就有晒潛水人員喺度準備，所以場戲拍得好順利、一Take過。」

而同樣有落水戲的羅霖就透露因不懂游泳故獲安排替身，但仍需親身上陣演水中掙扎戲份：「嗰日都好大浪，因為我唔識游水，所以拍之前我好擔心，問過導演幾次點拍，因為我好驚，平時喺泳池我都驚架喇，海就更加驚，因為見唔到底。導演就叫我唔使擔心，話到時會有替身。」Candy又指拍攝臨跳落海劇情前，因現場大風又大浪，結果雖然有阿仔高鈞賢傍住，仍是狀況百出：「我企都企唔穩，跣低咗幾次，仲畀石頭擦損腳，飲咗好多啖海水。跟住我返到屋企就肚屙喇，可能同飲咗海水有關，但見到拍出嚟效果好，都值得喇。」Candy又謂當日雖已吃了暈浪丸打底，但仍敵不過風浪：「我係好易暈浪嘅，食咗暈浪丸之後都係嘔。」