吳耀漢設靈｜洪金寶回憶與吳耀漢合作：我哋好少被佢整蠱
撰文：胡凱欣
出版：更新：
一代笑匠吳耀漢上月9日離世，其家人於今日（8日）在世界殯儀館為他設靈，他生前好友洪金寶及岑建勳等人都有到靈堂致哀，洪金寶曾於電影《五福星》系列中與吳耀漢合作無間，他在接受《香港01》訪問時表示懷念老友。
吳耀漢今日設靈。（葉志明攝）
洪金寶被問到靈堂內播放《五福星》系列電影會否令他感到有回憶時，他說：「呢個梗係多回憶啦，睇到好多回憶，諗起吳耀漢，諗起我哋一齊嗰陣時到而家都好多回憶，睇咗就更加更加個感受就大啲。段段都好多回憶，唔係淨係邊一段，但我參與落嚟，自己睇咗落嚟，原來我哋合作咗好多年，好多好多部戲，有好多好多開心嘅時刻。亦有好多好多嘅笑聲，我哋拍戲嗰陣時好開心㗎，冇任何政治背景嘅壓力，乜都冇，好開心㗎。」洪金寶又提到與吳耀漢合作無間非常開心，有很多珍貴的回憶。
洪金寶接受訪問時表示懷念老友。（葉志明攝）
另外洪金寶被問到有否被好友吳耀漢「整蠱」時，他則說：「我哋好少被佢整蠱，我整蠱人就有，我整蠱都係笑嘅嘢嚟，唔會話整到對方心痛啊、肉痛啊、骨痛啊，只係視覺上同啲嘢好好笑。因為大家都知道有時開玩笑要知道對方係一個咩人，如果係成龍就可以篤入啲，流少少血都唔怕。」
洪金寶話自己好少被吳耀漢整蠱。（葉志明攝）