【東京喰種池袋開cafe】佐佐木希參演真人版 婚後人氣超新垣結衣
撰文：伍景欣
出版：更新：
原著漫畫主角們以咖啡店「安定區」做基地，東京池袋都即將有間短期cafe，這道「金木的獨眼咖喱」，眼球紅噹噹夠搶鏡，不過左睇右睇都唔似係飯，放入口實是勇氣的表現。（網上圖片）
漫畫改編真人版電影《東京喰種》將於7月暑假在日本上映，同期競敵《銀魂》日前出3千蚊招影迷扮吉祥物伊麗莎白造勢，《東京喰種》都唔輸蝕，即將在東京池袋開設期間限定cafe，招待粉絲齊齊「食人」！
《東京喰種》講述吃人的「喰種」活躍於東京街頭，主題cafe售賣的食物當然非一般，最衝擊眼球的有「金木的獨眼咖喱」（カネキの隻眼カレー ），以男主角金木研的獨眼look為靈感創作，另外有Rc細胞特飲（Rc細胞ドリンク）、「雛實的漢堡肉」（ヒナミのハンバーグ）等10多款選擇，又眼球又手指...未擺落口純睇圖都覺得恐慌。「喰種」唔易做，頂唔順的話可改點人間食品「超難吃三文治」（まずいサンドイッチ），這是漫畫中金木研變成「喰種」後味覺改變，連普通的三文治都覺得難食。
世上有種吸引力叫「期間限定」，粉絲想親嘗「喰種」滋味要把握時間，食店於5月27日至6月28日在池袋營業，期間會有戲服展覽，另只要點選「金木的獨眼咖喱」，就可戴上金木研眼罩影相，聽落都過癮，不過大前提是……要有勇氣點這個咖喱。
「超難吃三明治」其實就是雞蛋三文治，全店唯一的人間食物，不過唔太啱金木研口味，好想去東京試試係咪真難食？（網上圖片）
「食物」有幾古怪？睇過你就知：
+6
佐佐木希於電影中扮演咖啡廳店員「入見佳耶」，跟窪田正孝同為喰種。（網上圖片）
佐佐木希加盟做店員
《東京喰種》電影版由窪田正孝飾演主人公金木研，演員陣容有清水富美加、鈴木伸之、蒼井優、大泉洋等，官方昨日追加卡士，榮升人妻的佐佐木希、村井國夫、相田翔子等也會加盟，跟窪田正孝在20區的咖啡店「安定區」共事。佐佐木希婚後繼續活躍幕前，她近日在劇集《小巨人》的表現獲觀眾激讚，指她做人妻後魅力及演技幾級跳，甚至比「逃恥女神」新垣結衣更可愛，情況有點似北川景子，原來結婚有如此大影響力？若然池袋cafe可以見到佐佐木希捧餐，相信定必大排長龍。