郭富城有感而發︰大住個肚好辛苦　電影新海報祝母親節快樂

由新婚當日起，郭富城已一直被傳媒追問住太太是否懷孕，是否快做爸爸，不過城城一貫地答得似是疑非，模稜兩可。來到今日，將於出年大年初一上映的賀歲電影《西遊記女兒國》，就發出三款最新宣傳海報，當中所見唐僧、沙僧及豬八戒都大住個肚，而孫悟空就只充當手模，作狀想摸一摸三個圓大肚皮，似有玄機想透露喎。

3款電影海報，是由星皓電影製作，特別於今個星期發出，以祝賀母親節快樂。海報主角包括有唐僧、八戒和沙僧。原來大肚是今集情節之一，幾位途經女兒國時，誤飲子母河河水，結果「搞大咗個肚」，唯一倖免是扮演孫悟空的城城。雖然不用「懷孕」，但城城坦言在片場看到羅仲謙等人挺住個大肚，坐唔係，企又唔係，也戥3人辛苦，並有感母親們十月懷胎確實辛苦，何等偉大。於是趁今個星期母親節，電影公司便發放這批海報以祝天下母親快樂！

早前，電影一眾演員，包括郭富城、馮紹峰、小沈陽、羅仲謙、林志玲等，在北京一齊為10部宣傳巴士揭幕，為隆重其事大家都禮服上陣。不過眼利的城城一眼就睇出羅仲謙身上的白色禮服，正是當日與楊怡在英國秘婚的新郎服。被踢爆慳家的謙仔，起初都尷尷尬尬，但回神後就立即反擊︰「我唔夠城城有錢嘛！」既是事實又不失大體，回得好！