【人有三急】猛鬼6廠女廁有奶茶婆婆 家燕姐：約埋一齊先去!
撰文：林通賢
出版：更新：
家燕姐在舊電視城拍劇無數，她表示亦聽過6廠鬼故的傳聞。（5.76億世界Facebook／資料圖片）
電視城出名多鬼故，尤其清水灣舊址，一廠鍾保羅、服裝間、化妝間等...幾乎每一個位置都有鬼，最近，facebook《5.76億的世界》的作者就去到這個已荒廢的電視台探險及拍照，這位廢墟愛好者，影了不少珍貴照片亦令網友想起電視城的鬼故，當中最出名應該是奶茶婆婆的鬼故，關於這個故事其實有兩個版本，第一個就是在銀影路，每逢深夜有位婆婆會問途人喝不喝奶茶？無論你喝不喝都要答她，否則婆婆會跟著你走。第二個版本是發生在6廠女廁。而這個版本恐怖得來亦非常好笑。
6廠女廁最多鬼故，除奶茶婆婆外，亦有傳滕麗名在這裏撞鬼。《相片由5.76億的世界》
第二個較少人知的版本是由錄影廠道具部值班流出，指奶茶婆婆在6號廠女廁出現，會敲門問如廁中的人要不要奶茶，更會遞廁紙，認真好服務。這次《5.76億世界》作者亦有到這個「勝地」拍照，廁門亦已破爛不堪，但由於日光日白，恐怖感就大減，這個女廁當年就多數是拍《真情》、《皆大歡喜》女演員用，《香港01》亦訪問了薛家燕，她兩套劇集都是主角，而家燕姐亦表示聽過6廠女廁的鬼故。
家燕姐現忙拍新劇《燦爛的外母》，在劇組中聽過不少鬼故。（資料圖片）
家燕姐對6廠鬼故亦有所聞，回憶當年在那裏拍攝的情況，她說：「我係聽過6廠嗰個女廁係有污糟嘢，我就冇見過啦，但好多同事都驚，我哋《真情》拍劇就全部用嗰個廁所，所以當時好多女同事去廁所，都要約埋一齊先去，唔敢一個人行入去，同埋個廁所比較濕㗎，有一次就係話有個同事入去照鏡，就話見到隔離有個古裝長頭髮，着白色袍，以為佢係拍古裝啫，但當佢望返塊鏡就唔見嗰個人喎，咁跟住佢就好驚走出女廁。我諗嗰度比較陰暗啦，係咪有鬼真係唔知，我就通常有助手陪我嘅，日頭就冇咁驚，夜晚就驚啲囉。未見過，都係聽人講，但有時急呢...趕時間我都要照去㗎喇，都係傳說唔知係咪真....頭先拍劇問馮素波、王俊棠，佢哋都記得6廠有鬼。」不過家燕姐咁正氣，一個十字步都嚇走佢啦。