【逃恥女神】新垣結衣「gakki頭」好蝦人剪 髮色面形樣樣關事
有頭髮邊個唔想做新垣結衣？日劇《逃避雖可恥但有用》去年底播出後紅遍東南亞，掀起一股「gakki（新垣結衣）熱潮」，她在劇中的食譜、衣着、台詞統統成為粉絲摹仿的重要指標，在可愛面前無條計投降！結衣BB一頭「美栗牌」蓬鬆短髮更加唔洗講，不過唔係人人都可以剪，事關表面簡單的短髮其實非常考究，要睇個別髮型師的手勢之餘，面形、髮色、長度、層次樣樣都關事。
首要睇面形
面型跟電視節目一樣，也有好多種，自然唔係個個髮型都啱剪。新垣結衣初出道時蓄長髮，非常清純，之後因為拍《亂馬1/2》特意剪成短髮，之所以一樣咁好睇，全因她有一張標準鵝蛋形小臉。如果面部比例較長的人，就千萬不可以剪gakki短髮，因為愈露出下半臉只會令塊面顯得更長。
髮色、長度要注意
驟眼望新垣結衣的頭髮以為是黑色？那你就大錯特錯了。結衣BB在劇中不算溫柔，還有點固執，配上黑色頭髮就會變得過於剛強，仔細看看，她的頭髮在陽光下呈深栗色，令她更添了幾分柔和，霧面深栗能令髮型看上去更輕盈，更貼近新垣結衣型的透明感女生，最重要是返工都染得！而短髮長度要貼近下巴末端，長啲短啲都唔得㗎。
旁分劉海、層次分明
劉海是個教人又愛又恨的傢伙，太短難carry，太長又拮眼，最簡單就是學新垣結衣稍微旁分，想剪劉海又怕變小學雞的人必試。「gakki頭」的另一重點就是層次，近年one length當道，剪頭髮時總是不忘叮囑髮型師不要剪碎或透薄，不過想學結衣BB先要過到呢個心理關口，皆因她的髮型強調俐落感，所以髮尾會剪得比較薄，頭型變得更圓弧，提升可愛度。
一定要蓬鬆
新垣結衣的短髮非常多變，一時把碎髮撓到耳後，一時又會把頭髮微微燙曲，但所有造型都有一個共通點，就是夠！蓬！鬆！蓬鬆的短髮能給人活力十足、隨性自然的氣質。在香港潮濕的天氣下，未到下午茶時段頭髮已變得扁塌，記得要選擇具蓬髮效果的造型產品，才能時刻保持亮麗，如果屬於油性髮質，剪前要三思。
顏值不足諗諗先
新垣結衣之所以能剪「gakki頭」，全因她是新垣結衣。所謂一剪錯，滿盤皆落索，真係少幾分自信都唔好剪。