【日本舞台劇】足球小將真人版超搞笑 冇波扮踢波後空翻似雜技
早前日本公布了會將經典漫畫《足球小將》改篇做真人舞台劇，原本構思同製作幾有創意，不過唔少網民看過宣傳片後就笑到反肚。其實《足球小將》向來是吐嘈極品，要真人化實在不易，正如星爺在《回魂夜》入面話：「做人最緊要有想像力！」睇舞台劇同話劇都需要觀眾帶個腦入場，而近年在日本大為流行的動漫舞台作品就更上一層樓，配合大量舞台機關和投射影像，把漫畫中「不可能」的動作由演員呈現大家眼前，不過出來的效果就未必套套得，一不小心更會「膠」力四射……
今次《超體感Stage足球小將》舞台劇，用上由Sony提供的Interaction technology，號稱比4D影院更強的感官科技，觀眾入場只要戴上手環等裝置，當舞台上做出特效時便能感受到衝擊和壓迫，勁過玩VR遊戲。官方今日（17號）開始預售門票，最貴索價12,800日圓即要成千蚊港紙，不過試新科技自然要付出多少少。到底有幾好玩要等到8月公演先知，但早幾日出的宣傳片就令到網民好「衝擊」，事關演員在台上似玩雜技多過踢波，彈出彈入又打空翻，雖然原作本身都係咁，只不過真人做就十分有喜感，而最重要係「個波呢？」整條片都看不見有足球在台上，演員們均在踢空氣，更加要「人力」視角轉移扮射門，當真少一點想像力都唔掂。相信正式上演時會以影像投射個波出來，重現識轉彎的「衝力射球」。
演員造型雖然冇「反地心吸力頭」但都唔錯呀！唔信就睇睇：
火影舞台劇最精彩
其實日本動漫ACG舞台劇經常都有出位之作，諸如《網球王子》、《聖鬥士》、《戰國BASARA》之類，都是認真做卻反成搞笑效果，而近年最爆的要數《破風弱男》（弱虫ペダル），以公路單車賽為背景，一眾演員在台上拿住手把扮踩單車，雖然有點滑稽但故事非常吸引，觀眾看完都大讚，令原作漫畫一躍成為神作。當然，也有一些如《海賊王》、《火影忍者》等的佳作，演員造型和燈光、舞台特效高度配合，以極高還原度演出，令人拍案叫絕。