港姐馮盈盈最愛食酸辣米線 即場聲演落單阿姐口音
撰文：郭敏玲
出版：更新：
馮盈盈話自己而家瘦咗好多，以前都好瘦喎！（郭敏玲攝）
應屆港姐冠軍馮盈盈話咁快就要做人師姐，今日出席《2017香港小姐競選》記者會。各港姐都有擺自己上枱，將自己的舊照公諸於世，馮盈盈笑言有點怕羞：「好耐冇見以前嘅自己，望返之前嘅我都幾清秀呀，望返而家就發現自己其實瘦咗好多。」大學修讀食物及營養學的馮盈盈，她笑言好想增肥，奈何自己體質本來就是食極都唔肥，現在奉行的方法就是「有咩就食咩」：「我要同減肥嘅人相反，佢哋咩都食少啲，我就熱量食多啲，蛋白質同脂肪都要多啲，但又唔食垃圾食物囉。」
馮盈盈原來鍾意食地道美食多過貴價嘢！（郭敏玲攝）
不過講開又講，睇開馮盈盈instagram都知她好為食，經常捐窿捐罅搵嘢食，原來Crystal都好貼地，喜歡食比較平民化、或是傳說中的隱世美食。她說：「好鍾意食大排檔同茶餐廳呀之類嘅嘢，食大排檔係因為我住沙田，咁喺屋企附近，而且好出名......如果你知我講邊間嘅話！如果有機會嘅話，我都好想去掃街。」馮盈盈仲自爆好喜歡她成日吃有「香港人美食」之稱的某家雲南米線，對於這間米線將被日式餐廳集團收購，馮盈盈非常清楚：「我諗佢都會好清楚自己本身有住好貼近香港人口味嘅特色，相信就算之後易主咗，都會保留返呢個特色，因為如果食日本嘢就唔會去呢間度食啦！始終去食都係想食本身嘅味道嘛！但如果多啲gimmick嘢，例如有日式嘅服務，我都覺得幾新鮮嘅，但味道就唔好改變，我都係好鍾意食佢嘅酸辣湯底。」
除此之外，馮盈盈對米線店的特色－阿姐口音，感到親切：「我知道有時大家聽到會覺得好搞笑，但對我嚟講就覺得好親切，尤其是佢哋會講『懶肉勿演山小』咁......我覺得要有呢啲先似去咗嗰度嘅感覺，希望佢會keep住再加啲日式服務啦。」見馮盈盈講起，所以就請佢示範一下「阿姐口音」，睇片喇。
+5