楊潮凱係絕種好老公 愛妻怕同老婆嘈交：最終都係要氹返佢
TVB出名人工少，都聽過不少藝人呻搵得幾多，唔夠生活等等，有份演《不懂撒嬌的女人》的楊潮凱其實都深明這個道理。但為了自己喜歡做的事，他無怨無悔，亦了解到可能走出去找一份銀行工作人工會更多，不過自己一會行屍走肉地上班，有甚麼意思？現在返公司拍劇，每日都好開心，有一種熱血的心去拍好每一個角色，這樣亦是對自己和觀眾最負責任的行為。《不懂撒嬌的女人》接近尾聲，自己的演出也得到了觀眾好評，他好感激兩位前輩宣萱和林文龍對他和江嘉敏在各大專訪中給予的讚賞，這無疑是一種鼓舞和肯定。要感激的人又怎會得兩位？不過講到拍劇生涯當中，他最感激的一定是身邊的一位，就是阿凱的圈外老婆。
有老婆 萬事足
談起老婆，阿凱立即就整個人甜蜜起來，而且好肯定地說是在十七歲前一個月跟老婆開始拍拖，而且還是初戀！雖然他不是老婆的初戀，不過阿凱絕不介意，他對這些事沒甚麼所謂。拍了拖十一年年，三年前終於拉埋天窗，事隔十四年都記得幾時開始拍拖，真係好Sweet！世界彷彿充滿了甜蜜，雖然還要為供樓奮鬥，不過從他眼中看到的不是氣餒，而是幸福。他說：「佢好支持我，係我最強後盾，所以有個好好女人喺後面係好重要。好在喺一個好好嘅時間買咗樓，而家仲供緊，係辛苦架唯有同老婆每人出一份，咬實牙關撐落去。」
老婆要用來鍚 不是要來鬧
在《不懂撒嬌的女人》中，主要講述香港女生在撒嬌這一方面輸給其他地方的女性，但阿凱就表示自己老婆絕對沒有這方面的問題，他說：「佢都會撒嬌，正常都會喇，好合理姐。絕對唔係劇中Mall姐嗰種，我唔得㗎咁硬嘅女人，我呢啲潮州人好大男人㗎，雖然我唔係話要我take over晒所有嘢，最好就係小鳥依人咁。但都唔可以好似劇中台妹純純咁樣，太起雞皮喇，雖然係靚女，做女朋友就ok，但如果係日日對嘅老婆就太辛苦喇，最憎呢啲，哈哈！而詩詠嗰款就係典型嘅香港女仔，刻苦耐勞，會同你一齊捱，間唔中會溫柔，獨立又得，我就最鍾意，我老婆就絕對係呢種。」談到與老婆如何維持關係，他指最緊要是雙方互相信任，因為有這一種信任，他跟別人相處的時候反而輕鬆了，沒有顧忌那麼多。當自己得到了對方的信任和給予的空間，便會明白到自律的重要性，「其實我都有同女星食飯，無人影到啫，哈哈。其實我同人建立關係，總之我同你係朋友，我有老婆㗎喇，都唔會有咩發展，大家咁樣做朋友咪好舒服囉。佢都會間唔中串吓我架，會話你就爽喇，笑完就無嘢喇。我地嘅關係就係咁樣，佢知我係做嘢，會好大方。」不過親熱戲都盡量避免被老婆看到，但原來阿凱老婆是教書的，有時候學生看見阿凱的演出便會將片段給他老婆看，阿凱就奉勸老婆的學生們：「唔好再cap圖俾佢喇，真係好危險，唔好搞到我地家變喇，哈哈。」其實要建立信任很簡單，阿凱指跟老婆一早已經講明不會偷看大家的電話，亦不會輕易把分開說出來，這麼多年來都相安無事。而且最緊要的事不要鬧交，他說：「我奉勸咁多位男人，千其唔好同另一半鬧交，因為去到最尾都要哄返佢。有時我都會把幾火鬧返轉頭，但靜一靜之後就知道瀨嘢喇，又係要自己哄。其實除非你唔愛佢㗎啫，如果唔係最終都係要哄返佢吳㗎啫，咁不如一開始就唔好嘈咁咪最好囉。」
拍親咀戲並不好受
講起親熱戲，阿凱之前演出劇集《純熟意外》要和孫慧雪做情侶，有網友幫他改了個新花名叫「宅男公敵」，他當時都覺得幾好笑：「不過啲網民對我好好，無乜點評擊我，你知喇，有啲人真係會俾人話到體無完膚，我就最多係俾人叫我放開雪雪。咁啱而家呢套劇我又要同江嘉敏有咀戲，之後又俾人話，真係對唔住喇，呢啲都係劇情安排。其實喺同雪雪之外，我喺公司做咗五、六年，係完全無呢啲親密戲，唔知點解呢套劇之後就keep住有咁多，連同何雁詩拍MV都要鍚。哈哈，呢啲可能就係運氣，可能我打後五年都無呢啲戲喇。」當阿凱被問到哪一位女藝人最好咀，聰明的他就轉了個角度去答，他指其實拍這種親熱戲過程並不好受，因為有很多事情需要兼顧，他說：「你拍嘅時候雖然好投入，但其實側邊都有好多人望住同好多拍攝上嘅嘢需要配合，同埋作為男仔其實好尷尬，因為你唔知個女孩子點諗，雖然好好彩我拍過咁多個kiss戲嘅對手都係好朋友，通埋溝通得好好，因為我好驚俾人話我係色情王，所以其實都幾辛苦架。」所以有時阿凱收到劇本時都會有點害怕，心諗：「又鍚？」甚至有記者問過他這些鍚鍚劇情是不是他自己加上去。
講到親密戲，床戲少不免比親咀更為激情，他自己也有過一幕跟雪雪激情熱吻再上床的戲份。不過他就指自己完全無任何生理反應：「就好似頭先咁講，太多嘢要兼顧，又要理機位，又要諗點落床，因為驚壓親人，其實好多細微位要留意，無乜時間諗其他嘢，要有嗰啲反應真係好難，所以我都唔明點解戴耀明會動L，哈哈！明明嗰場戲我同佢一齊拍，我都無留意到。」