TVB講波初體驗網民激讚 阿仙奴忠粉袁文傑：做嘉賓吹下水好啦！
相信有唔少巴打在凌晨都有為睇英格蘭足總盃決賽－阿仙奴對車路士這場世界大戰而收睇TVB。有不少球迷留言表示，因為有「游生」袁文傑呢位阿仙奴忠粉做嘉賓，所以才打開電視機睇TVB。不過，有時候總係好難十全十美，網民睇得游生，代表要睇埋進化成為荷蘭叻的陳百祥。就算唔想睇，都要睇落去，因為難得有得免費波睇嘛！就係咁，就有不少球迷見證這場球賽，同時都目睹荷蘭叻爆了甚麼金句、游生又有甚麼出色表現。
話口未完就有網民將荷蘭叻的金句輯錄成精華片段，大概他也不會猜到有人竟會為他這樣做。首先見到英國皇室威廉王子進場，鍾志光佻皮地問荷蘭叻：「呢個係咪你老友呀？」阿叻立即回答：「我哋回歸咗喇，係好朋友。」但過了一會女歌手Emily Haig準備唱《God Save the Queen》時，阿叻爆響口：「為我哋唱國歌！」知道講錯嘢，才弱弱的補回：「佢哋嘅......」未完㗎！即場評述時，講到車路士球員夏薩特今場比較沉，講完夏薩特即刻有波掂。仲有其他金句㗎：
（賽前）我就兩隊都咁鍾意㗎，所以呢我係冇所謂嘅，最緊要大家一齊欣賞呢場好波！（賽後）我其實都鍾意阿仙奴㗎！不過見佢（袁文傑）著晒衫咁，畀佢開心下先啦！跣一跣，好似謝拉特咁樣......唔係喎，佢中個波吖嘛，中個波吖嘛，兩個人一齊中吖嘛...嗱，佢中個波吖，你睇住吖嗱，佢係中個波之後先中...係咪啊？佢中個波吖嘛
不能盡錄......
好多網民睇完荷蘭叻的神級講波，直言他言之無物，加上他整場波都不斷說話，更覺得他沒有理會身為嘉賓的袁文傑。相反，初次在TVB講波的袁文傑，就獲網民大讚：「游生資料夠，仲講咗好多阿仙奴隱患，及車仔長處，如係阿仙奴迷，會好有共鳴。」、「游生真心分析，其他嗰幾件淨係識講邊個好波邊個唔好波」，看來光是足球知識，對比起鍾志光與荷蘭叻，游生已經超班。
《香港01》就問到袁文傑，他笑言：「能夠睇到自己心愛嘅球隊可以攞冠軍，我已經好開心㗎啦！成場波我都好Enjoy，我覺得咁樣都幾好玩喇。」講起阿叻與鍾志光喪講嘢，有時講得似有還無，更有網民發現他們講錯話，而袁文傑都不太出聲，任他們講，他說：「我都係做嘉賓啫，負責喺適當嘅時候發表下意見。又唔會話想做主持咁，做嘉賓吹下水，冇咩壓力都幾好呀。」
提起阿叻，游生對他的評價都不錯：「我呢挺咁固執，啫係鍾意足球嘅人呢，都係好鍾意同其他鍾意足球嘅人一齊交流。我一路睇住場波，其實叻哥一向都有踢開波，咁佢有好多即時嘅犯規判決，球證點樣判罰呀，佢都即刻可以有個講法，可以話畀觀眾聽，其實我覺得好難，因為一路睇一路要有個諗法，隨時要講出嚟，呢個唔係咁簡單做得到，呢個就係經驗囉。」游生講到熄咪之後，仲會同叻哥傾更多波經。至於有網民話叻哥講波的方法太老土？游生就話：「咁點解林尚義阿叔講波到依家都仲咁多人掛住？因為佢講嘅方法都唔係新㗎，我覺得任何情況之下，唔需要分新舊，最緊要中point㗎啫，有啲觀眾就係鍾意人講波有即時性，又有人鍾意了解背後嘅資料嘅，所以一場波有多過一個評述員就係咁解，都係cover唔同人嘅口味囉。」