【任噏影評．加勒比海盜】無限復活你玩晒　專心睇女主角好過

《加勒比海盜》呢個系列出到第5集，之前嗰集有幾爛都好，大家都會入場支持，點解？一來Johnny Depp魅力沒法擋，二來我覺得成套戲最吸引嘅，唔係劇情，唔係打鬥畫面，當然親情愛情都要放埋一邊，而係女主角Kaya Rose Scodelario。呢位索爆女星今集一出場就搶晒大家嘅焦點，尤其佢件緊身衫，性感得嚟又充滿美感。當有一場戲佢要除衫跳海嗰陣，我諗好多男觀眾嘅反應同Johnny Depp一樣好鬼期望，可惜佢只係除咗一件外衣就算數，大失所望。呢位25歲嘅女星已經喺唔少套電影擔正做女主角，最為人熟知一定係《移動迷宮》系列，2018年第3集都會係佢主演，前途真係無可限量。

講返套戲，其實拍咗咁多集啲劇情已經拍到爛晒，不過佢勝在可以不停咁復活，有排玩。今集喺最後部分前３集的男女主角Orlando Bloom同埋Keira Knightley又出返嚟，好明顯就係為咗之後嗰集鋪路，加埋個片尾彩蛋，之前個心臟被刺穿嘅鬼船長又出現返，所以又可以reboot再嚟多次。其實講到尾最衰都係今集個男主角Henry Turner（Brenton Thwaites飾），如果唔係佢打爆咗支海神三叉戟，所有嘢都唔會發生，一切可以喺呢集都完結。講真，嗰支海神三叉戟，英國海軍又搵緊佢，Johnny Depp又要搵佢打亡靈，Barbossa（Geoffrey Rush飾）又要搵佢保寶藏，Henry又要搵佢救老竇，今集奸角Salazar（Javier Bardem飾）又要搵佢統一海洋，女主角又要搵佢證明老竇講嘅嘢，咁多人為佢打生打死，剩係出咗幾分鐘就打爆佢？雖然係劇情需要，但係話晒都叫做遠古神器，俾多幾個鏡頭佢都唔過份呀？講起劇情，有唔少人都留意到，只要俾之前個女主角錫過就一定會死，今集最尾佢同Orlando Bloom久別重逢又嚟咗個世紀之吻，唔通下集Orlando都係逃唔過死嘅命運？不過唔緊要喇，反正死完又可以返生。