【奇妙電視】鄭中基上杜汶澤節目講飛機鬧事：台灣賺的錢全賠去了

奇妙電視開台已經有半個月，除了大家討論追唔追到台之外，最令大家有反應就是杜汶澤主持的綜藝節目《杜汶澤食住上》。該節目已播出了兩集，請來鄧麗欣、鄭中基（Ronald）做訪談嘉賓，一邊食阿澤煮嘅嘢，一邊吹吓水。即是類似《志雲飯局》的模式，不過有阿澤當然就搞笑得多。這是節目的一部份，另一部份就是阿澤去買餸再到落廚，之後再俾一位試食嘉賓品評。頭兩集就搵咗何韻詩老竇何德星同埋周中師傅，周中仲同阿澤來個隔空罵戰，過程十分過癮，難怪有好多網民大讚節目好睇。

就在剛剛星期6，鄭中基呢位搞笑之人加埋阿澤，觀眾們一定笑到收唔到聲。又講吓家庭，又講吓當年老闆拍戲，又講吓Ronald點識老婆，明明看來不好笑的話題，到他們手上都變得十分好笑。其中Ronald重提當年在飛機醉酒鬧事，原來這件事令到他初出道在台灣走紅幾年賺的錢都賠出去了，他還憶述當時酒醒後便發現自己被扣上手銬，而且眼前還出現兩個FBI探員，唔知死嘅佢仲以為係發緊夢，所以笑一笑就繼續瞓。直到再醒的時候便知道真的出事了，被人五花大綁送去羈留室，不過佢強調自己無因為這件事發生而戒酒，還講笑話一定要控制到酒精，所以一直都keep住繼續飲。

節目已知的嘉賓還有林海峰、何韻詩、王宗堯、江若琳等等，不少都是和阿澤合作過或者志氣相投的朋友，相信內容都會十分精彩。不過觀眾想睇到，就一定要搜台成功，因為現在仍然有不少聲音是說搜尋不到奇妙電視台。而且奇妙並沒有網上直播，連重溫服務都沒有，好彩有熱心網民上傳到YouTube，等大家有得回味一下，雖然應該係無版權，不過有得睇，咁你話睇唔睇呀！