張繼聰失蹤白只撐住拍《今晚》MV 作曲人波多野裕介扮埋喪屍

撰文:許育民
出版:更新:

6月29日上映的本土喪屍電影《今晚打喪屍》,對於兩位男主角張繼聰與白只而言,這不單是電影,而是兩位好兄弟相識20年來,終於合作做出成績來。
咁有意義,當然連主題曲都唔放過,一齊拍住唱《雙截龍》。不過世事就是不圓滿,夾到時間錄音,就夾唔到時間同大忙人張繼聰拍MV。結果,要作曲人波多野裕介粉墨登場,還捱義氣化埋妝夾隊喪屍Band出來Jam歌。

夾開Band的朱凌凌,其實都好Rock得下。
唔係話講日文就有型,但波多野裕介又真係有型。

MV日前進行拍攝,並鎖定在牛頭角行人隧道取景,白只本身是樂隊朱凌凌的成員,但他稱今次絕對是最Rock and Roll一次,拍攝時更激動到多次揈跌昂貴音響器材及眼鏡,「因為首歌太正,好容易就令人投入到那種熱血狀態。上次在錄音室唱已經覺得好好玩,今次還要full band上陣,好爽。」可惜好兄弟阿聰因為拍劇分身不暇,未能現身一齊玩。白只說︰「我好肯定這是他的損失!」

頭先彈結他係波多野,呢個成口血的都係波多野,個喪屍妝幾正!
不單止造型,連動靜都似喪屍,波多野就是專業。

缺了阿聰,得白只一個就未免太寡,於是就提議由主題曲作曲人波多野裕介上陣。身為音樂人,又是今屆《香港電影金像獎》「最佳原創電影音樂」得獎者,別以為波多野會一臉正經,原來相當玩得,不單止與白只狂Jam他們口中的「Crazy Rock」,又彈又跳又唱又嗌,仲要扮埋個喪屍妝,與Band友化身喪屍怒跑,表現拍得住專業演員。波多野裕介說︰「今次我更會挑戰Rap一段廣東話,MC波多野in the house,哈哈,希望成功!」聽到呢句,的確要留名等睇。

拍攝MV時雖已是深夜時份,但都引來大量途人圍觀,更有少女因聽到波多野裕介講日文,而誤會他們是來自日本的組合!