黎明返大陸搵真銀 事隔23年再拍電視劇 

撰文:黃梓恒
出版:更新:
黎天王竟然去大陸拍劇,莫非唔夠錢使?

黎明呢兩年幫NESCAFÉ拍了兩個廣告,短短幾分鐘的廣告劇場極有當年黎明拍和記電訊廣告的影子,觀眾們大呼過癮,事關他已經有接近12年無拍呢類型廣告。不過相信觀眾想欣賞黎天王英姿的願望唔使等好耐,因為他已經落實會拍大陸長篇劇集《莫語者》,事隔23年再拍電視劇,仲要係有成40集咁多!其實近來黎天王都已經成日北上做綜藝節目,所以今次拍大陸劇都唔算太意外。

早前開鏡未見黎明,但就有香港導演劉順安(前排右二)。(網上圖片)
又一個中國少女要上位喇!(網上圖片)

想當年黎天王在TVB拍劇的日子,以《天涯歌女》同《原振俠》最為津津樂道,不過1994年拍完最後一套《阿Sir早晨》便離開了TVB專注歌唱事業。事隔23年,黎天王終於再重返電視,雖然唔再喺香港視圈,不過套劇的總導演劉順安都在TVB打滾多年,都叫做有啲香港元素喇!此劇集是一套關於中國海外安全題材的電視劇,說穿了就是一部宣揚中國強大的劇集,名副其實是「中國夢」的思想,香港人未必會好想睇。呢套講「中國夢」的電視劇,只係上佢官方微博就已經感覺到強烈的中國味道,只係睇它簡介呢套劇的短短幾行字,已經兩次提及「一帶一路」,真係好hard sell。不過打住黎明呢個旗號應該唔多唔少都有一班粉絲追捧。套劇在5月29號已經開機拍攝,不過在大合照上未見黎天王蹤影,都啱嘅,唔通未有戲份要黎天王等咩?其實套劇到而家都好神秘,除了黎天王之外,仲未好清楚有咩演員,盛傳女主角會係90後演員胡冰卿,又係一個樣靚後生的學院派新人,拍得住黎天王嘅一定又會爆紅喇!

真係可以好直接架中國人。(網上圖片)