【蘭花刼】驚現勁多熟面口失蹤甘草 牛頭角順嫂十年冇見好懷念

撰文:
最後更新日期:

網民月頭狂轟的「偽」高清10年出土劇《蘭花刼》話咁快去到最後直路,今個星期日就大結局,並由王晶監製的《賭城群英會》接棒。姑勿論大家開心,還是極度唔捨得都好。都想問大家一個問題,當你睇返10年前嘅劇,有冇一種感覺:「點解有啲人熟口熟面,但又好似好耐冇見佢嘅?仲要講唔出個名。」俗語有云:「十年人事幾番新。」一線小生姐仔都變晒90後,舊嘅演員大多都各奔前程,想當年大家見慣嘅綠葉,而家有啲都淡出娛樂圈。今次就為大家介紹好幾個在《蘭花刼》出現的「失蹤人口」,重新呼喚他們的名字。

大叫順嫂!(網上圖片)

梁葆貞

首屈一指梗係要講起「牛頭角順嫂」,大家對佢把聲、做嘅傳統婦孺角色,都有極度深刻印象!認真,《蘭花刼》確實是她在TVB最後一套作品。現年81歲的她,已經長居加拿大,得閒才回來香港。早前她有出席過公開場合,表示連TVB都不清楚她幾時回港,所以好難夾到期拍劇,加上她在加拿大生活悠閒,退得休自然沒有太大意慾工作,所以大家咁耐冇見佢,都會覺得:「乜順嫂出返黎?」但其實睇埋呢套就冇喇

嘉儀姐。

陳嘉儀

在劇中飾演羅樂林老婆的嘉儀姐,又係好耐都冇見過佢!原來她是TVB第一期訓練班出身的藝員,於90年代曾一度息影,2000年代再回巢拍劇。2007年,除了拍《蘭花刼》之外,當年還是多產之年,拍過多套大劇。不過此後又開始減產,直到2013年拍埋《鳳舞香羅》就冇再喺TVB見過佢。唔經唔覺,陳嘉儀已經登七喇!

江漢叔幾型棍。(網上圖片)

江漢叔以前都幾靚仔。(網上圖片)

江漢

江漢叔又係一個印象好深的藝員,一望就覺得好面善。想當年他60年代初入行,就已經是電影界的當家小生。後來加入電視界,做開正氣、霸氣、有型的成功人士角色,大家都公認佢為實力派綠葉!去到2011年開始減產,直到2012年《回到三國》裡客串過一集之後,就淡出娛樂圈。《蘭花刼》算係江漢叔的滄海遺珠。

賤婆婆最深入民心。(網上圖片)

黎宣今次做修女。(網上截圖)

黎宣

講起宣姨,就會知道佢當年係TVB的「御用媽媽」。除了長篇處境劇《真情》之外,最為人熟悉、最經典就是1992年《大時代》做丁蟹媽媽「賤婆婆」,鬧到丁蟹鬧到入心入肺。自從2008年拍完《Only You只有您》就息影後,《蘭花刼》出土就成為了回顧宣姨演技的節目。現年85歲的她,就當然要同老公恩愛到老喇,經常見到佢哋出街拍拖,勁sweet。

之前做開老細。(網上圖片)

佢副眼鏡都好似係一個標記。(網上截圖)

郭德信

如果當年有「御用乜乜乜」的話,郭德信與陳鴻烈都是「御用老闆」的不二之選。64歲的他,曾是TVB著名綠葉,做忠又得、奸又得,得咗!由於他外型就滲透了幾分高貴味道,所以做來做去都是富貴人家。而他最後在TVB的作品就是2011年《天與地》客串過下做神父,就係咁,6年來都冇新作品。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。