TVB未來劇集與內地網站合作　杜之克：題材不會自我審查



蔡思貝在TVB劇集《踩過界》中面有瘡疤，牙又要哨，相信不少觀眾睇到都會嚇到嗰心離一離。今午劇集舉行發布會時，蔡思貝再以角色造型現身，霎眼睇真係好似《食神》中的火雞姐！蔡思貝說不怕大家話抄火雞姐，「一來角色不同，我今次是做律師，可能大家會覺得個感覺相似，相同性格的角色都有好多。」

至於劇集決定星期六、日播，蔡思貝直言有擔心過，「其實我當初知道的時候都有恐懼過，始終星期六、日大家都放假出街。但之後諗下都覺得未必是一件壞事，因為劇情好濃郁有好多東西要消化，舒舒服服睇兩日可能用5日時間去討論下。」她表示好感激呢棚哨牙，「因為牙套一帶上去對白就講唔好，搞到成個人好無自信。好彩之後帶慣咗拍得好順利，反而要多謝棚牙。」

同場還有無綫助理總經理杜之克，他表示今次《踩過界》算是TVB首部與內地視頻網站聯合出品的劇集，播映時間亦希望可以同步播出。那是否即是香港優先播？杜之克回應時似乎有點避忌，「其實內地那邊仍調節中，但我相信都是差一兩天播，不會隔太久。」他亦不擔心劇集星期六、日播會變炮灰，「有好多人會話翡翠台是慣性收視，但其實我們是粒粒皆辛苦，現在每一點都是努力得返嚟。而星期六、日是否無觀眾呢？我睇到的情況是顯示有觀眾。」 杜之克在台上亦指，之後將有多部與內地視頻網站合作的劇集，問到會否在題材上先「自我審查」？杜之克表示，「我們會先討論哪些題材或表現方式會適合內地，不牽涉劇本創意方面。」