專訪|王嘉慧闖星途不靠富爸爸 螢幕「第一次」想給呢位衝動小生
現年29歲的王嘉慧(Cathy),絕對是人生勝利組,不但有樣貌有身材,而且還是學霸兼家底豐厚,爸爸是「內地傢俬大王」王亞明,雖然如此,但王嘉慧身上並沒有一點千金架子,參選港姐入行的她肯搏肯捱,憑主持《東張西望》、《通靈之王》引起網民注意,加上各樣條件優秀,獲網民捧為「東張女神」。女神理應有很多裙下之臣,但王嘉慧卻專一又長情,與金融才俊男朋友拍拖9年,藉住情人節(14/2),王嘉慧分享了二人的甜蜜愛情故事。
場地:TERA(大圍)
與男友拍拖9年 自認浪漫女友
除了有樣貌、有身材、有學歷和有家底外,王嘉慧還有愛情滋潤,她透露與圈外從事金融的男朋友已拍拖9年,兩人在英國讀大學時認識,一起讀書之後一起返港。雖然自細在好的環境成長,但王嘉慧對另一半的要求好簡單,就是:「對我好、專一同錫我,咁已經好足夠。(除此以外男友有何吸引妳之處?)佢好乖仔,唔會容易受到誘惑。記得讀書時,都有啲女仔去親近佢,但佢唔會理,可能我都有少少氣勢啦,哈哈。」
王嘉慧至今只得2次戀愛經驗,但有趣的是,兩段關係原來是有關聯,她表示初戀發生在中學時期,當時初戀男朋友去了英國讀書,她覺得Long D好辛苦,后來便跟著飛過去,但到當地後,兩人是沒有見過面,因大家都寄宿,最初只想著大家在同一個時區,傾偈都容易些,很多情況事前沒有預料,這段感情就這樣無疾而終,但亦因此讓她之後遇上現任男朋友。
與男朋友拍拖9年來,水瓶座的王嘉慧自認都算浪漫,所以她每年都會想出一些小心思,為對方送上不同驚喜,「例如喺英國嘅時候,我會親自炮製一頓西餐,由前菜到甜品一手搞掂,連Menu都整埋,好有儀式感的。」而問到男友通常有何表示時?王嘉慧無意拋了一句:「要諗下先,因為太多了。」雖然看似簡單一句,但足以看出男友超級錫她。王嘉慧續言:「我諗最Sweet一次係佢見到我喺度食珍寶珠,跟住佢居然去買咗一大筒返嚟畀surprise我囉。雖然價值唔係話好高,但呢啲細小嘅舉動我已經覺得好sweet,睇得出對方對自己好細心,我唔需要好浮誇嗰啲。」
入行向男友派定心丸
問到是否視男友為結婚對象?王嘉慧直言始終女演員的花期有限,想先在事業拼搏一番,不想突然在這個時候結婚,男友也很體諒和明白,「我睇好多風水師傅,佢哋都話如果我太早婚唔係咁好。」但娛樂圈出名誘惑多,問到她現時入了行,男友會否很擔心?王嘉慧向對方大派定心丸:「對我嚟講,佢唔需要擔心,大家一齊咗咁耐,有信任喺度。而且我都係專心做嘢,唔會去溝仔。」
至於一對情侶拍拖期間少不免會有拗撬,王嘉慧笑指與男友多數都是為一些好少事鬧交,但好快又沒事:「通常我都會先去𠱁下佢,又或者認少少低威先,等對方軟化落嚟,但其實大家都會遷就對方嘅。」王嘉慧自覺都算是一個幾遷就人的女朋友,只要能力範圍內做到的,她都會去盡力遷就對方。笑指她貴為千金小姐,都要去遷就別人?王嘉慧搞笑說:「有時喺屋企畀人寵壞咗,咪要出去磨練下,否則永遠都係一個受保護嘅小朋友。」
爸爸曾反對入行 用表現軟化對方
王嘉慧承認自細受爸爸保護下成長,所以她最初表示想入行時,爸爸是非常反對,覺得好危險、好擔心,但她本身是一個好怕悶的人,寫字樓工作不適合她,反而在做兼職模特兒時,發現自己對幕前工作感興趣,所以便趁在Deadline前參加《香港小姐》,一來圓了自己的自細港姐夢,而且參選港姐也是入行一條較快的路,所以便試一下,「其實中間有段時間,去到拍宣傳片嘅時候,爸爸突然好反感,可能諗諗下覺得都唔係咁安全,因為啲人成日話娛樂圈係大染缸,直頭係想我退選,於是我用咗好多時間去說服佢,因為我選時都26歲唔後生,我同爸爸講如果我再唔去就冇機會,我唔想令人生留下後悔。而且喺參選期間,爸爸都睇到我好畀心機、好努力,見到女兒喺台上嘅感覺唔同咗,我諗呢樣都有少少感動到佢,令佢軟化咗,放心畀我繼續發展落去。」
作為倫敦大學心理學學士,以及中文大學法律系碩士,在娛樂圈發展外界難免會覺得大材小用,但王嘉慧不認同:「好似我以為讀法律冇乜用,但我去年主持《LAW霸女神》又用得著;有時就係咁,機會嚟到嘅時候,你就會發現學到嘅嘢原來都用得上。」
闖星途不靠富爸爸 曾因被標籤不開心
而對於參選以來一直被標籤有個富爸爸,王嘉慧坦言都曾有人在她面前說過「妳都唔憂心做喇」這類說話,雖然對方是說笑,但她最初聽到時都會不開心,好像覺得她沒什麼料子要靠屋企,但聽多了就慢慢明白不用理會別人說什麼,做好自己便可,「因為我真係鍾意做呢樣嘢,而且例如劇集、節目呢啲全部都係靠我自己努力爭取返嚟,所以我而家可以大條道理同人哋講我唔係靠屋企。」
自覺幸運 29歲起步不會遲
回顧上一年,王嘉慧自覺幸運,主持方面除了《東張西望》和《通靈之王2》外,還有《LAW霸女神》;劇集上則參與了《新聞女王》、《逆天奇案2》和《黑色月光》。問到現在29歲才開始起步,可會覺得遲?王嘉慧不認同,她表示拍劇需要好多不同的角色,並非全部都是要青春少艾,也有不少角色適合她,所以沒有特別去擔心,「與其擔心,不如做好自己,花呢啲時間去自我增值,例如我有去學打拳保持身型,也有跟鄧智堅學戲。」
王嘉慧直言雖然主持好有挑戰性,從中也獲益良多,但她是希望能多往演戲方面發展,「因為覺得拍劇你會覺得好似學極都唔夠,每次都有唔同痛新年嘅出現,我就係鍾意呢種新鮮感和刺激感。」而且最令王嘉慧開心的是,在算是首套有角色的劇集《新聞女王》中,可以同佘詩曼合作,「雖然唔係同佢有對手戲,但都可以話成日睇到佢演戲,一開始係唔太敢同佢傾偈,因為好似小粉絲見到偶像一樣有啲怕醜,但阿佘係勁好,平時搞好多gathering,影相時又會走埋嚟同我哋打成一片,當你係朋友一樣,完全冇架子。」
不介意性感演出 螢幕「第一次」想給吳卓羲
而有留意開王嘉慧社交平台,都知道她身材一流,問到如果要她性感演出,會否接受?王嘉慧直言角色、劇情需要的話,她不介意,如果有做足安全措施,內衣也可,「但我都會事先通知男朋友,諮詢一下意見。(如果男朋友不給呢?)如果遇到一個好好嘅角色,又合理嘅話,我唔會推,我會嘗試去說服佢。」
至於螢幕初吻對象,若果有得給她選的話,王嘉慧又會想給誰呢?她想了一想後,怕醜說吳卓羲和黃宗澤都很好,但非要選一個的話,她會想是吳卓羲,並笑言:「我喜歡呢啲衝動派,同埋我之前有睇大灣區哥哥,覺得佢keep得好好,完全同我細個睇佢時冇分別,好靚仔。」
踏入2024年,王嘉慧希望繼續可以拍多些劇集,還有她入行以來,一直都很想拍一些旅遊或飲食節目,希望今年有機會。另外,王嘉慧覺得自己入行後這幾年性格上變化好大,以前她是很怕醜、完全不說話的人,但現在面對那麼多人,要迫自己多說話,整個人變得比以前開朗,而且提醒自己要保持那份熱血和上進心,才不會被淘汰。
點擊圖輯看更多王嘉慧靚相: