劉嘉玲爆梁朝偉4萬球迷前同碧咸合照勁驚青 ：問可唔可以唔出去影
撰文：吳子生
出版：更新：
劉嘉玲今日（14/2）現身中環出席《Chubby Hearts Hong Kong 》開幕活動。今日適逢情人節，嘉玲透露會和偉仔（梁朝偉）食飯慶祝：「其實我同佢都比較傳統，都會送禮物畀大家，因為呢個世界都變得簡化咗，就好似用手機畀利是，同埋傳短訊咁，全部都係用手機就搞點。相反我呢啲咁嘅年紀，就鍾意寫張卡，同埋收吓花同禮物。不過自己就想收到健康，因為自己年紀開始大，都開始生活簡化啲，物質需要都冇以前咁大，最緊要健康快樂。」
嘉玲今日出席《Chubby Hearts Hong Kong 》開幕活動。（陳順禎攝）
講到早前她與偉仔現身香港大球場同碧咸合照，偉仔出現腼腆笑容。嘉玲笑言：「其實佢係好驚，係我拉佢出去，佢係唔鍾意嘅。佢不嬲都同我講，問我可唔可以唔出去影，我就話唔得囉，因為我想佢同佢影。原先佢以為係喺一間房度影，點知一出去就係4萬人嘅球場，我自己都嚇咗一驚，我係好驚佢調頭走，好似美斯唔上場咁，哈哈。自己本身都係碧咸嘅粉絲嚟，亦係偽球迷嚟，佢冇上場獻技，只係場邊行嚟行去，我唔會好失望。而我喺球場坐咗90分鐘，對我嚟講已經夠埋單啦。」
偉仔露出腼腆笑容。（直播畫面）
偉仔露出腼腆笑容。（直播畫面）
嘉玲透露今日情人節會同偉仔食飯。（陳順禎攝）