香港小姐首輪面試質素未理想 高層轉移視線:碩士學歷都有十分一

撰文:
最後更新日期:

TVB副總經理(節目及製作)杜之克先生(右)及節目監製陳旭亮先生(左)透露外景暫定在亞洲地區。(郭敏玲攝)

炎炎夏日,又來到香港小姐首輪面試的時候。今年膽大參加港姐的少女比往年少了一截,只得131人。而今年質素比往年更為參差,可以話冧巴越後,質素就越......(大家明喇)。據知今年有TVB副總經理(節目及製作)杜之克先生、節目監製陳旭亮先生、梁烈唯、吳家樂、丁子朗、陳凱琳、代蓮曦丹美、劉穎鏇、陳雅思做評判,當中包含著住泳衣傾偈環節。

其實今年質素比往年真是明顯下滑,TVB副總經理會見傳媒時就只有從學歷層面留意,他表示參選的人學歷越來越高:「淨係碩士學歷都有十分一。」往年除了本地佳麗,都總會有內地參選者,但今年再有新局面,就是多了兩位100%西方臉孔的外國女生參選,似乎與「香港小姐」不太吻合喎。杜先生就話:「參選得港姐真係要有香港身分證先得。」他笑言見到兩個外國女仔時,感覺特別,「有一個都覺得有啲奇怪,但另一個9歲就已經喺香港,半個香港人嚟㗎,廣東話雖然唔係好得,但都溝通到。」如果入圍到決賽,還真的是史無前例,但都怕會招來爭議,香港小姐應該係真正香港人喎。杜之克再講:「首先唔應該因為語言同血統限制,正如我頭先所講,有個由細就係香港生活,甚至香港出世。所以咩血統唔係關鍵,重要嘅係佢係咪香港人。」

杜之克先生表示將會篩剩12人進入決賽。(郭敏玲攝)

另外,今年港姐入圍之後就要利用Big Big Channel幫自己拉票,成為新一屆冠軍。杜之克先生說:「呢個以後咁多屆港姐都要咁做,所以之後會鼓勵佢哋開多啲Live,但詳細玩法未定。」想不到除了全台藝人之外,未正式成為TVB成員的未來港姐都要玩埋一份,杜之克就否認借她們谷新app:「其實一直以來,網絡都係一個大趨勢,同埋係全台嘅藝人同外界互動嘅平台,係必然嘅一部分。」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。