作為一個資料搜集員，鍾意看書是合情合理的，蒲鋒真係咩書都睇，由外國通俗小說甚至古文，都是他的範圍，令他愛上當資料搜集員，全因為讀書時看了Frederick Forsyth 的書，一看令他著迷，他說：「我讀書嗰陣好鍾意睇外國流行小說，佢哋嘅最大特色，就係資料搜集做得好足，嗰陣時有好多作家都好出名，我到而家都好欣賞，譬如Frederick Forsyth寫嘅《The Day of The Jackal》，故事講一個職業殺手行刺法國總統戴高樂，呢個係好誇張嘅橋段，但佢寫得好仔細，直頭好似教科書，你跟住本書一步步去做，真係可以殺到總統。」

「另一個係Arthur Hailey，佢好得意，得閒就會寫一個行業，譬如佢寫過《The Wheels》，就係講底特律汽車工業，《The Moneychangers》就係講銀行業，佢每本書就會講晒嗰個行業，每個層面係點運作㗎喇，睇完你真係好似識咗個行業好多咁，我就係因為睇咗呢啲書，引起我好大嘅興趣，而當年又有呢個機會，所以就走咗入電視台。」蒲鋒曾是資料搜集員，亦是影評人，亦追求認真製作，但他看電影亦會懂得放鬆，他說：「每套戲都係虛構，我講緊係故事片，就算幾似真都係虛構，我哋會接受佢嘅tone，如果有啲戲需要一個真實嘅tone，但做唔到呢？我就有少少質疑，譬如我睇過《辣警霸王花》，咁一定唔真啦，但我覺得ok啦，佢揾欣宜做女子特警，真實世界一定唔會揾欣宜啦，因為佢哋對體格要求極嚴格，但呢部係誇張喜劇，我覺得冇咩所謂喎。」

除了外國的，蒲鋒亦很欣賞徐克和胡金銓，尤其《笑傲江湖》，他說：「我記得睇《笑傲江湖》，戲入面佢哋要打開琴譜，我一睇就認得佢哋跟足《三才圖會》入面畫嘅琴譜，手指點擺位，點彈，指法係點，胡金銓係套戲嘅總導演，佢係一個明朝嘅專家。我自己都比唔上去，所以套戲有啲位做得好仔細，而《三才圖會》呢本書係拍明朝必備嘅書；另一本係《清俗紀聞》，本書勝在多圖，雖然是繪畫的，但有不少我們少見的古代器具。嗰陣遇到相熟又重視資料的監製好似李添勝，我都幫佢買一本。」

做資料搜集認真，但蒲鋒指不是每套電影都需要資料搜集，他說：「拍戲（包括拍出好戲）唔一定要資料搜集。很多好戲應該都冇資料搜集，但唔妨礙，資料搜集不是必需的，很多影片從編劇導演個人經驗出發，不大需要資料搜集，《重慶森林》不需要資料搜集，無損佢係好戲。資料搜集既不是必需，亦唔係用來衡量一套戲好壞的標準，喺應該做資料搜集而没做資料搜集，即使對無心挑剔的觀衆，電影都會顯得虛假，就會失去說服力同投入感，呢個先係關鍵作用，資料搜集最强的作用其實係喺商業片，佢令假嘅橋段似真，香港成功的例子，當然係陳嘉上的《飛虎雄心》，佢嘅新作《蕩寇風雲》雖然唔算賣座，但影片是好片，佢嘅優點亦係建基於資料搜集。」

外國、日本都有非常強勁及出名的資料搜集，但香港好像不太注重，即使TVB有資料搜集組，但冇人理會，蒲鋒估計是因為以前港產片的成功，好多時都沒有資料搜集，他說：「我估計啦，可能因為傳統。過去港片商業上成功，都不用資料搜集，咁就習慣咗唔做。甚至無論金錢或時間，都冇呢個預算，其實過去五、六十年代的粤語片和國語片，都冇資料搜集呢回事，七八十年代動作片天下，也不需要在呢方面講究 ， 而呢啲影片成功，亦證明市場接受不講求資料搜集的影片，起碼對港片係咁啦，於是構成循環，當然，全世界最大市場的影片，都係唔使用腦，爭取社會最大一群人都能明白和接受嘅電影，《變形金剛》或者漫畫英雄片就係例子；但美國日本另有重視知識嘅傳统，呢個亦關乎佢哋電影人重視自己的文化建設有關，會拍一啲唔係太賣座，但有幾多電影可以先？，但依然可能有錢賺的電影，例如《The Big Shot》，大賣座而粗淺的电影，整體市場當然要，但佢地都重視知識的影片，通常會獲得尊重，奥斯卡就成日是推許優質產品，好似《復仇勇者  》。」