港視獲發牌《選戰》《警界線》有望拍續集？ 王維基：編導去晒TVB
撰文：何志衡
出版：更新：
《警界線》原先已籌備拍續集，但因政府唔發牌而擱置。
王維基去年參選立法會選舉，目的是反對梁振英連任，結果輸咗，不過梁振英亦沒有連任。
由王維基揸旗的港視昨日終獲政府開綠燈，獲發流動電視牌照，等咗幾年以為「一男子」換上「一女子」有突破，之但係呢個牌照複雜到爆，甚麼DVB-T2制式、甚麼數字視頻廣播一大堆難明術語，重點係……究竟我睇唔睇到先？
其實好簡單咁講，就係喺電視機好難睇到，用app或者上網就睇到，點解會咁？再簡單嚟講就係港視主席王維基首次申請牌照失敗後，2013年向中移動購入流動電視業務，但要在港經營需要向通訊局申請，王同時再度申請免費電視牌照，如意算盤是兩者兼得就天下無敵，可惜事隔4年，所謂開綠燈其實只係得流動電視服務過到關，所以屋企部電視睇唔到。
王宗堯為港視拍過《選戰》及《導火新聞線》，都是觀眾期待有續集的作品。
放長啲雙眼睇又點呢？政府仲有機會開埋另一盞綠燈批埋個牌俾王維基，我哋係咪就有機會睇到《選戰2》、《警界線2》或者《導火新聞線2》呢？
《香港01》致電王宗堯，佢認為獲發流動牌照是：「好事嚟！再睇下點。」問他會否有機會再為港視拍劇，他就回答：「都想拍嘅！到時睇下王維基點傾。」
《選戰》導演黃國強已被劉德華招攬過檔。
不過港視自從2014年轉型開拓網購市場後，不論演員、編導演均採取自然流失制，王維基透過發言人回覆：「有一半編導去晒TVB啦！其他要等適合時再公布。」意即再開劇有困難。
有現任港視高層則透露：「就算政府而家批埋個免費牌出嚟，港視嘅商業模式都變咗，加上做咗網購3年一直蝕錢，最近啲訂單至多番同埋穩定啲，但王生資金少咗，網購未賺到錢，佢已經冇以前咁多錢，邊有錢拍劇！」他又指如果只靠流動制式，就算拍劇都唔會一個鐘一集，可能得十幾分鐘一集以減低成本，而且編審、導演有一半已回巢TVB，肯唔肯再為王維基打仗實未知之數。
好似《警界線》編劇朱鏡祺已返回無綫，早前大熱的《不懂撒嬌的女人》便是他作品，至於《選戰》導演黃國強，已被劉德華旗下公司招攬為其製作劇集《香港華爾街》，睇嚟短期內無望為港視服務。
+12
想再睇到智叔廖啟智演《選戰》同《警界線》續集似乎有難度。
港視好劇不少，例如《導火新聞線》更被拍成電影。