【誇世代】江美儀32°C著大褸拍劇 fb爆:前世做錯事今世做電視

撰文:黃梓恒
出版:更新:
江美儀正在為《跨世代》開戲。(網上圖片)

正在拍《跨世代》的江美儀,昨天在Facebook post上了一段跟黃智賢在雪中對話的片段。只看片段大家都會感受到那陣寒氣,但其實昨日氣溫高達三十二度,兩人還要穿著大褸拍攝。除了這一場之外,江美儀還要跟關禮傑拍婚紗戲,而且套婚紗還要是樽領,難怪她自己都說:「汗奔……汗流……萬里濤濤汗水永不休……!」她在接受《香港01》訪問時說:「真係熱到啲衫都濕晒,同關禮傑嗰場我要坐喺個地下度,可能因為個地氣好重熱氣,我一坐落去就係有啲晃晃地,好彩工作一員俾個木箱我坐,隔一隔啲熱氣,我諗塊地真係可以拎嚟煎蛋架!」

真係望到都覺得熱呀!(網上圖片)

大熱天時拍冬天戲的確夠「攞命」,所以美儀姐都在每一個post上加上hashtag「前世做錯事今世做電視」,由於十分應景和押韻,所以不少朋友覺得十分好笑。不過原來這句說話並不是今日才有,她說:「其實句嘢本來係『前世做錯事今世做亞視』,不過亞視執咗喇,改一改做電視又得喎,咁咪照用囉!其實除咗我地演員,製作團隊一樣都係咁辛苦,因為場戲啲雪其實係鹽嚟,啲鹽俾太陽射嗰陣會反晒光,好刺眼。最慘係拍完之後,有個掃地姐姐要一個人掃返晒咁多鹽,好慘!其實都幾唔好意思,不過無辦法喇。」

點睇得出原來成三十度。(網上圖片)

其實除了今次要夏天拍冬天戲,美儀姐都試過另一種辛苦經歷,不過就來一個相反,那一次是在極寒冷的天氣拍落水戲,她說:「記得嗰陣係拍《九江十二坊》,嗰段日子係全港最凍嘅時候,我地要連續兩日喺沙灘同泳池落水,真係凍到好誇張。我好記得係凍到陳錦鴻都有啲瘋狂,佢嗰陣突然大嗌一聲:『阿仔,阿爸搵錢係好辛苦架』之後就跳咗落水。嗰陣拍一場落水之後我要即刻去沖個熱水涼暖身,但之後又要再落過水,真係無份咁上下勇氣都做唔到架!其實我覺得觀眾真係要欣賞我哋呢種刻苦耐勞,有好多時都剩係睇到我哋風光嘅一面,而睇唔到呢種辛苦。」其實無論演員還是製作人員,甚至是掃地姐姐,都有他們辛苦的一面,希望大家都會學美儀姐所說,欣賞他們的一份努力。

有時辛苦都唯有頂硬上!(黃智賢Instagram)