【素顏抱女】陳冠希女友秦舒培　同囡囡Alaia餅印一樣

陳冠希最近同余文樂網上掀罵戰又暗串《中國有嘻哈》冇Hip Hop精神，其實咁躁為乜呢？不如學下女友秦舒培咁同囡囡玩下輕鬆下好過啦！

Aliaia呢件紅色衫仔之前都着過。

睇落對眼真係幾似媽咪秦舒培。

秦舒培喺ig放咗張同囡囡Alaia嘅合照，素顏嘅秦舒培抱住肥嘟嘟Alaia面貼面好溫馨，囡囡咬住手指望鏡頭確係好可愛。

雖然之前陳冠希同秦舒培都放過囡囡照片出嚟，但媽咪面貼面抱囡囡合照應該係第一次，如果有埋Edison三人全家照就更完美喇！

網友睇完張相都大讚可愛同充滿正能量，又覺得Alaia眼細細、眼尾尖尖同媽咪秦舒培餅印一樣，而囡囡微微起角嘅眉毛就似足嗲哋陳冠希。

秦舒培今年3月誕下囡囡之後極速修身，從佢ig照片睇根本冇肥過，身形fit到極，反而囡囡就比之前肥咗啲，唔知會唔會幫囡囡減埋肥呢？

呢排陳冠希是非多多，不如多啲陪屋企人修心養性啦！

秦舒培產後極速修身，唔講唔知幾個月前生完BB。