【任噏亂評．同盟】胡定欣打得勁不及色誘吸睛 鹽花浪費演員努力
去年一套《城寨英雄》大獲好評，令原班人馬上陣嘅《同盟》被受期待。劇集播出近三分之二，幾乎每集都有賣點，鮑起靜演技出眾，演員打得落力明顯有下功夫，但網上不乏對此劇失望之評語，亦為視后胡定欣感到不值，到底《同盟》問題出在何處呢？
問到身邊朋友，對《同盟》一劇有甚麼印象，得到的答案包括：胡定欣扮母狗叫、姚子羚好性感、定欣煎Pan鴛鴦浴……筆者有追睇呢套戲，平心而論各演員都非常盡力，55歲歐瑞偉洗脫KC形象打到飛起，被封「香港007」；68歲郭鋒3個打8個寶刀未老；影后級鮑起靜好戲就無容置疑啦﹗
年輕一輩做得未到位嗎？姚子羚首次以打女形象示人，車內一打四動作俐落，令人眼前一亮；胡定欣陳展鵬比《城寨英雄》打得更出色，巴西柔術、MMA樣樣出齊，定欣甚至連失傳已久嘅「奪命較剪腳」都出埋。其實外國一樣經常有性感女星打得起勁，好似《復仇者聯盟》中黑寡婦般，一樣好性感一樣會有色誘情節，觀眾通常讚嘆身型靚、打得出色，點解《同盟》又會令演員付出與收獲有落差呢？
成套劇最大問題可能在於劇本及對白上。例如胡定欣陳展鵬被捉住，為求脫身胡定欣居然腿張開，呢個畫面再配合她說：「你想點都得啦！」但下一幕就係佢一個翻身，三扒兩撥將敵人全部打低，咁，腿張開嘅意義何在？還有那堆連環色誘陳展鵬的場面，真係做到睇都覺得好尷尬。
又，姚子羚被綁上七人車，身穿連身短裙以一敵四，係打得好睇，但身為女觀眾真係每一個動作都擔心ELAINE會走光(男觀眾點諗就唔知啦…)仲有派張秀文去色誘鄭子誠，得罪講句色誘都唔使不停叫佢向前俯身將心口放上檯面，長期影住事業線，除左灑盬花吸(男)觀眾，呢幾幕，其實真係可以CUT。
TVB要進步要創新，無問題嘅，參考外國劇要女演員著得性感啲，但打到拳拳到肉，都好睇嘅，但真係唔使集集都色誘囉，睇得多都會悶都會滯架……而一班演員打得咁辛苦，到頭來觀眾只記得佢地幾咁性感同有無走光，好想講句，麻煩配套得好啲，劇情好啲啲，對白好啲啲，唔好辜負一班好演員啦。