【嫁到這世界邊端】分居陳貝兒講婚姻數度落淚：從佢哋眼神看到愛

由陳貝兒主持的無綫節目《嫁到這個世界邊端》昨晚首播，原來呢套又是編導岑應的作品，唔似得岑應之前的節目例如《有樓萬事足》、《盛女愛作戰》和《沒有起跑線》等有些好爆的金句，講咩「有樓有高潮」、「冇樓唔好白撞」同埋「贏在射精前」等等，今次呢套明顯是Sell溫情和感性，由陳貝兒走訪嫁到世界各地港女的婚姻生活，講下點樣為愛犧牲，當然亦有甜蜜溫馨的日常。而搵來陳貝兒做主持其實都是一個話題，唔知是無綫嘅計算，定還是真係啱啱遇着剛剛，陳貝兒拍攝呢個節目的時候，正正就是她跟前夫已分居並準備辦理離婚嘅時候，要一個剛剛經歷婚姻觸礁的女人，去見證其他女人的幸福婚姻以及人哋夫妻間的恩愛之情，真係一件好殘忍嘅事嚟。

而在第一集裡面，陳貝兒就數度落淚，分別以三個不同造型現身三個不同場境的她都有喊，仲次次都唔係因為感動而係因為感觸，看來是被截到痛處，正所謂人唔傷心唔會流眼淚嘛。節目中當她聽到女主角甘願為丈夫放棄一切離鄉別井嫁到德國，即雙眼通紅。她除了佩服對方的勇氣，亦感觸地表示：「愛情的力量真係可以好大，可以令一個女人完全不顧自己，就係為了一個男人」說完不禁掉下眼淚。之後她在女主角的家中講到結婚就是一場賭博，她和女主角說：「其實女人就是這樣，你結婚的時候，如你所講，你不知道會怎樣，但你會發現如果，如果那個男人真的深愛你，像你老公咁愛你的話，你真是為他做清潔工都值得。」說完又喊。最後當陳貝兒講到很羨慕女主角可以找到一個咁愛她的男人：「我從他們的眼神中看到很有愛，我都希望有男人會用這種眼神來看我，而這種眼神和這種感覺，是值得為他放棄一切的。」又再次忍不住哭了。有網民指陳貝兒太過感性，又話她喊得多過女主角，其實如果明白她當時正處於分居期，就會明白她的心情，做藝人也不容易，很多時都是身不由己，試問有邊個失戀時想去睇住人哋晒恩愛吖。