袁詠儀投訴無綫劇本爛被雪 轉拍戲變影后：演技呢啲嘢天生！
9月4日剛渡過46歲生日的袁詠儀，一向是圈中烈女代表，率直敢言，當年被指口不擇言得罪不少人包括成龍，至近日先世紀合照和解。靚靚亦自認當年年少輕狂，遇上不合理的劇本竟然直接向監製甚至向傳媒投訴，最終被TVB雪藏。靚靚自嘲道：「我最錯就係同記者投訴！」
靚靚接受鄭紹康為奇妙電視主持的「天下第一Friend」節目訪問，選美出身的靚靚重提舊事，她快人快語笑道：「參加選美，因為我靚囉！不過入行後見到朱玲玲同李美鳯，嘩，佢地真係靚到不得了，我即刻同自己講：袁詠儀你改戲路啦，仲諗住做靚女，你死梗啦！」
靚靚自認當年年少輕狂，參加選美兼得冠軍和最上鏡小姐後更加恃才傲物，遇上不合理的劇本，竟然直接向監製投訴，不得要領後，又改向傳媒投訴。靚靚自嘲道：「我最錯就係同記者投訴，咁大間公司點容得下我胡言亂語！」鄭紹康問她是否隨即被「照肺」？靚靚笑道：「無照肺，係直接入肉！」
事後她被投閒置散主持音樂節目，靚靚瞪大眼珠說：「我又唔識唱，又唔識歌，連歌手名都唔係好清楚，更加唔鍾意主持節目，所以咪意興闌珊囉，好在及時有柯受良搵我拍第一部電影。不久靚靚更摘下新人獎，她得戚地說：「演技呢啲嘢，天生㗎！」
一提起囝囝「魔童」，靚靚眼神亦即時回復慈母般柔和，更如天下間父母一樣覺得愛兒最出眾，在靚靚眼中，魔童不但有梁朝偉的外表，還有周星馳的性格，靚靚笑道：「佢外表斯文靚仔，性格就風趣幽默，第時肯定好多女仔鍾意！」靚靚兩公婆對魔童教導有方，不過靚靚承認自己也有過做「怪獸家長」的時候，幫魔童的時間表排得密密麻麻，直到有次見家長，靚靚被當頭棒喝！
靚靚說：「嗰次見家長，老師問魔童平時做啲咩，我好勁咁數晒佢星期一至五有咩堂要上，跟住老師問：咁佢玩嘅時間呢？我聽到呢句說話就好似畀大盆冰水照頭淋，張智霖仲要在旁細細聲話：係啦，我都話咗佢架啦，佢係要咁！嗰下我真係想中埋去，不過之後我真係放棄咗做怪獸家長！」
靚靚更自爆校方曾致電要求見家長，並非魔童做錯事，而是覺得張家有問題：「因為有次校長打畀張智霖要求見面，話我地呢個家庭好有問題。原來魔童話畀校長聽爸爸之前做警察，最近就賣壽司，哈哈，所以我地先同學校講清楚我地嘅職業係演員，而魔童知道我地係演員後，只係問點解唔帶埋佢行紅地氈！」
至於愛兒有無遺傳她和張智霖的演藝天份？靚靚斬釘截鐵地說：「無，佢啲戲，好屎！基本上我都唔想佢做呢行，因為佢有我同張智霖呢對父母，入行嘅話肯定會比別人辛苦百倍！」