王君馨曾陷低谷患暴食症　晚晚不停食：係俾食物控制自己

成為人妻的王君韾，今日接受電台《一圈圈》訪問，回顧過去十年的演藝生涯。看似樂觀的她，原來曾經一度迷失，更試過患上暴食症。本來身型纖瘦的她，高峰期試過127磅。這個情況源自2011年她主持飲食節目《日日有食神》，其表現欠佳受到觀眾抨撃：「當時做咗港姐，未卸任就有《舞動奇蹟》，就有一個好現實嘅諗法，就係以為從此就一帆風順。咁上天可能見到自己開始驕傲喇，而呢個節目就有好多抨撃自己。」她坦言當時在美國返港，中文程度真的不太好，所認識的詞語都很缺乏：「當時真係唔識點樣用50種方法去講一條魚好好食，Even而家都係，以前唔識咩叫彈牙，就連嫩滑都唔識，當其時都覺得好辛苦，剩係將自己所識嘅方法表達出嚟。」所以就只會講「好好食」之類的說話，加上入行資歷尚淺，事後都覺得自己浮誇：「聽到自己把聲都覺得尖。」這個經驗，讓她現在都會刻意控制自己：「講嘢都會壓返低把聲。」

如是者，王君馨因為做主持壓力大，久而久之患上了暴食症。她一度覺得自己好假：「當其他人批評緊自己嘅時候，仲要笑住講下次會再做好啲，但自己依然係唔開心，好唔舒服。」於是她就將情緒壓抑，在外都不敢吃東西，回到家就不停吃：「因為人哋點講你控制唔到，但返到屋企你就可以control個食物。之後發現咗呢個問題之後，發現其實一樣畀食物控制自己」這個情況維持了九個月至一年，體重曾去到127磅：「雖然5尺6吋呢個高度，唔算係好肥，但對於香港嘅女藝人來講，就已經好肥！」最後由圈中好友趙希洛、周嘉蔚等人開解之下返教會，情況才得以改善。

雖然如此，王君馨仍感激這段低迷的日子。她說：「我選咗港姐之後，睇見呢個花花世界，真係會被吸引住。見到好多上流嘅人同名牌，接觸咗好多未見過嘅嘢。直到個節目之後，有一段時間冇工作做，你冇錢就會冇朋友，你就唔會想出去social。而呢個時候仲有人願意幫你，知道邊個係最好，所謂患難見真情，真係好在有呢個時候，去睇得更清楚。」後來，Grace再接受《香港01》的訪問，講到返教會後如何走出焦慮，她說：「自我價值健康咗好多，唔洗在圍住世界轉，想再得到好多認同，識得點樣去愛錫同珍惜自己，覺得自己係寶貴嘅。」雖然往後兩、三年，有壓力的時候，都會有暴食症的徵狀，但因為有一班好姊妹支持，漸漸她就不再依賴甜品，也自然地恢復本來狀態。

除了事業，原來王君馨曾經與拍拖11年的老公Daniel分過手，兩人最初一見鐘情，可是有不敵過Long D的時候：「最初分手係因為佢嘅妒忌。我同佢喺美國嗰陣，本身已經相隔三個鐘頭車程。之後我就到香港Exchange，本身我有好多朋友，有時候就會同男仔朋友影相，po上social media，佢都會問我係邊個嚟。到之後，當我po咩佢都會問好多問題。當時就諗如果少少信任都冇，仲點樣行落去，所以就分咗手。」都最後兩人成功復合，王君馨坦言因為信仰，所以令她更成熟。兩人分手後，Grace回應《香港01》時表示：「都會有一啲追求者，但都因為一直以來對Daniel嘅感覺好特別，個心都留咗個位置畀佢，所以都冇同其他人拍過拖。」與此同時，兩人不約而同地信了神，Grace都覺得是神的安排，讓他們復合：「好似將我哋link埋一齊咁，之後大家都有聯絡，發覺大家都成熟咗好多，於是都一齊返。」直到而家結埋婚，非常幸福。