港大何東Dem Beat似操兵　馮盈盈：參與Dem Beat係一種榮譽

日前香港大學Dem Beat 片段瘋傳Facebook，見到一班後生妹著到Minion咁，瘋狂踩地揮手，氣勢十足，即刻成為網上一大熱話，殊不知有網民發現只要係YouTube 搜尋Interhall Cheering Competition，你就可以睇晒港大Dem Beat片段。

最近翻炒出來的就係港大何東夫人紀念堂，2010年的Dem Beat片段，當時正舉行Cheers Competition，一班學生妹著住黃色Hall Tee整齊嗌Beat詞，就連肢體動作都超一致，但係網民見到就話：「點解會跳咁老土的舞，究竟Dem Beat係服眾定係團結？」見到一班學生哥入到大學要做依啲咁嘅嘢，唔知一班家長有什麼想法呢？

而同場對手香港大學大學堂實力更驚人，用少於何東堂一半的人數，竟然做出比何東堂更大的效果！一班後生仔著住港大傳統的綠袍，四個排成一行，手舞足蹈，一邊嗌住口號，一邊做住浮誇的表情，而且仲係扮晒可愛聲，用廣東話，普通話，英文嗌口號，去到最後更排排坐，一齊唱歌，箇中氣勢實在超強。

簡單嚟講，Dem Beat源於中文大學，意思是Demonstration of Beat，即係一大群學生搞活動果陣，著代表自己屬會或學院Tee，然後一字排開，一邊用腳大力踩地，用手配合打拍子，另一邊大聲叫喊口號，通常在活動宣傳和迎新營時學生會進行Dem Beat來吸引人注意。而港大亦有類似Dem Beat的文化，但一般會稱之為Dem Cheers，通常用黎團結舍堂或者比賽打氣用。不過為免大家混亂先當兩樣Dem做同一樣野。

港大畢業的馮盈盈，接受《香港01》記者訪問指：「Cheers Competition係港大傳統活動，每年係開放日舉行，專門表現比一班準備入大學的學生睇，希望佢地感受一下大學的文化。」對於Dem Beat的學生要做古怪的動作，口號的內容又奇怪，她就話：「只係旁邊者會咁諗，因為自己正正係開放日睇到Cheers Competition，比果種震撼同熱血吸引，所以好想入港大，而且港大的全體學生都非常重視依個比賽，覺得參與Dem Beat係一種榮譽。」最後盈盈好可惜咁講：「自己都有申請住何東Hall，不過就冇收到佢！」如果唔係，大家可能可以見到馮盈盈係片入面嗌口號！