Angelababy新劇取代唐嫣做女主角 網傳陳道明吳秀波相繼拒合作
Angelababy同黃曉明呢對圈中吸金力最強嘅夫妻，人氣旺盛但是非亦從來無停過。Baby產後繼續工作，接拍首套時裝劇集《創業時代》後，最近確定11月入組拍攝《欲望之城》，點知又惹來連串是非，事關最初電視台宣布，男女主角係由陳道明以及唐嫣擔崗，變成Baby出任女主角後，又傳陳道明辭演由吳秀波頂上，有傳因為幾位都唔想同演技備受質疑嘅Baby合作。
近年Baby全力於內地發展，雖然佢嘅演技一直備受批評，但憑住超高人氣依舊片約不斷。今年佢同內地實力派小生黃軒合作拍攝劇集《創業時代》，曾經傳出Baby某天播攝途中接到電話後突然離開劇組，連續5日未見蹤影，令黃軒要被逼同空氣借視線做戲，後來証實嗰幾日根本無Baby嘅戲份，呢次雖然是謠傳，不過是非仲未完呀。
9月中浙江衛視於秋季招商會，即係類似「TVB節目巡禮」嘅活動上，率先曝光明年待播劇集，其中一套係由陳道明以及唐嫣主演嘅《欲望之城》，當時指劇集會喺11月開機拍攝。事隔一個月忽然傳出女主角變成Baby，取代唐嫣之說吵得沸沸揚揚，估唔到事隔幾日又傳出陳道明都辭演，換成吳秀波頂上。
套戲一日未開拍，演員有變更都係平常事，無論係檔期問題定劇組考量都不意外，不過《欲望之城》嘅變故似乎比較特別。當大家仲消化緊吳秀波同Baby老少配做情侶時，又傳出吳秀波辭演嘅消息，雖然馬上有人跳出嚟澄清，指吳秀波專誠為呢套戲到米蘭添置一堆服飾，但估唔到大部分網友竟然留言讚好，也就是說在坊間輿情係支持吳秀波辭演《欲望之城》，比想他演的人更多。一次又一次變更，茅頭都指向Baby……
Baby近年喺綜藝同時尚方面表現不俗，但自從劇集《孤芳不自賞》後，觀眾對於Baby嘅演技一直都頗有微詞，而佢主演嘅劇集大部分口碑都差強人意，即使係王家衛監製嘅電影《擺渡人》，觀察普遍指Baby演技比同劇嘅梁朝偉金城武甚至熊黛林都差距甚遠。所以網友評論《欲望之城》陣容時，對Baby演技抱有極大懷疑。到底呢次孖住實力派大叔控吳秀波，佢會唔會嚟個演技大躍進呢？