【全職高手】楊洋又演網遊高手　宋祖兒踢走迪麗熱巴做女主角

楊洋去年因《微微一笑很傾城》而火速上位，雖然佢主演嘅電影《三生三世十里桃花》評價一般，但對佢嘅人氣同收入完全無影響，才剛完成劇集《武動乾坤》，楊洋馬上宣布將演出《全職高手》，該劇改編自同名暢銷小說，以網路遊戲競賽為背景，楊洋飾演電競高手葉修，被迫退役之後，以君莫笑一名回歸。由於楊洋在《微微一笑》演過網遊高手肖奈，在《全職高手》中演出同是網遊高手的葉修，無疑是適合人選。

而女主角方面，雖然之前有傳會係迪麗熱巴，但結果係由童星出身嘅宋祖兒擔正，現年19歲嘅宋祖兒素有國民妹妹之稱，早前曾經同陳柏霖、井柏然演出《花兒與少年3》真人騷，她在《全》劇中飾演嘅蘇沐橙一角，屬於超級美人，將會陪伴男主角度過難關，相信屆時都有唔少感情戲。其實除咗蘇沐橙之外，《全》劇另一位女主角唐柔，亦都不能忽視，除咗因為佢有無死角美女稱號之外，亦都係因為呢個角色將會由葉修所親手訓練。

《全職高手》自11年開始連載，曾獲「年度最佳作品」，去年推出動畫版時，首集就已經有過億點擊率，所以當騰訊宣布要真人化兼搵楊洋做主角時，唔少劇迷都表示十分期待。