【TVB台慶50周年】向綠葉們致敬最抵讚　佢哋先係無綫真正基石

每年台慶不外乎載歌載舞，演趣劇，抽獎派錢，中間穿插一啲當年流行話題人物，咁又一年啦。近幾年香港電視業起咗翻天覆地變化，有一堆默默耕耘多年嘅三四線演員被高薪挖角，一時間大家先醒覺，劇集唔可以每一套都同一個主角，但身邊配襯綠葉，卻能每套都出現並起了重要作用。來到50周年台慶，終於有一個環節特別向一眾Hidden Hero致敬，TVB終於醒覺？

萬千星輝賀台慶節目去到中段，有一個環節叫「福祿壽 Hidden Hero」，由阮兆祥、王祖藍、李思捷「二次創作」扮演三位荷里活超級英雄話要侵佔TVB，羅樂林、歐瑞偉、劉江三位近年爆紅嘅綠葉走出嚟保護娘家。單睇介紹佢地出場嘅片段，配上BOB旁白其實頗有心思，對話中帶出佢地為演出7日7夜不眠不休亦有用心設計。不過格硬要歐瑞偉跳舞，仲有劉江「FREE STYLE」RAP到甩晒BEAT就唔太識笑啦。

還好原來呢個環節仲有後著，借由三位去帶出一班，觀眾會好熟悉但未必叫得出名嘅綠葉，御用秘書何綺雲、忠心跟班楊證樺、最佳街坊蘇恩磁、戴耀明、有陰謀嘅鄭子誠、入行超過40年嘅韓馬利、老頑童秦煌，仲有胡楓同羅蘭。打工除左希望做好自己嘅崗位，都會希望得到公司重視認同，喺台慶夜佢地可以有少少時間分享幾句，雖然短暫但總算係剎那焦點所在，呢次安排絕對值得讚賞，如果能夠趁機改善佢地嘅待遇，TVB先真正能做到收復人心做番一個良心電視台。