【女友視角】關智斌曬肌溫柔Man爆兼備：唔使驚有我喺度﹗
撰文：洪曉璇
出版：更新：
仲有11日就係普天同慶嘅聖誕節，大家諗點樣同另一半慶祝未呀？買咗聖誕禮物未先？呢啲大時大節有人陪就話開心啫，作為單身人士，真係連房門都唔想出，喺街見到個個成雙成對就眼都冤埋，食飯又話得番二人餐，依家係咪歧視單身狗啫﹗雖然今年好多男神封盤結婚做人夫，但唔使擔心，仲有BFable嘅關智斌！呢日佢上載一條短片話：「提早送份聖誕禮物俾大家～（睇完有冇即刻搵返初戀嘅感覺）」
根據非正式統計，好多女仔都鍾意另一半篤吓額頭，就好似話緊「傻豬嚟架」。(影片截圖)
短片應該是為澳門新濠影滙拍攝的宣傳片，不過只見著住灰色背心露出結實手臂嘅Kenny，第一個shot已經挨喺床上面，對住個「女朋友」（鏡頭）用氣聲勁溫柔咁問：「醒啦？瞓得好唔好呀？」唔少女士都話聽到呢一句已經暈得一陣陣。片段加入唔少情侶間嘅互動，好似Kenny會篤吓女友額頭、拖住對方向前行，小小動作已經甜到漏，Kenny仲要餵食雪糕添，見到佢向鏡頭伸長隻手，大家有無不知覺向熒光幕伸手想拖住佢呢？
九成女士鍾意食甜品，九成九鍾意男友好似Kenny一樣咁細心。(影片截圖)
呢條女友視角短片，簡直道盡所有女士心聲，單身嘅渴望有個好似Kenny咁，有樣有身材又細心嘅男友，玩起遊戲時會好Man咁同你講：有我喺度唔使驚！已經有另一半？緊係想佢學吓點樣悉心安排行程啦，有幾多男友明知聖誕多人食飯都唔book位，想睇戲又唔訂定飛要大家喺度大排長龍先得架！Kenny上載呢條片短短一日，Facebook已經有無數朋友share，不過唔知點解，好似男性朋友比女士們更有興趣噃，唔通想跟Kenny學吓嘢？
見到呢一幕個腦即時響起：「我想就這樣牽着你的手不放開」。(影片截圖)
+13