【勁歌總選】麥明詩馮盈盈數白欖亂Rap　un住跳抖肩舞被批似痙攣

無綫年度盛事《2017年度勁歌金曲頒獎典禮》已經圓滿落幕，當晚的主持由J2節目《後生仔傾吓偈》的3名主持：麥明詩 (Louisa)、馮盈盈 (Crystal) 同陸浩明一齊擔任，不過就惹來觀眾與網民不少的負評，主要是批評Louisa同Crystal做得不好，例如話Louisa好呆滯，畀唔到反應，又話Crystal咬字不清有懶音，個妝太濃似殭屍等。當然除了兩位主持的表現，個節目本身都一樣有好多負評啦，例如要李克勤同4個完全唔同份量的後輩爭最受歡迎歌手獎，網民直指這對克勤可說是一種侮辱，荒謬至極。但最令人慘不忍睹的，應該都是3位主持的一場抖肩舞，仲要Rap住又un又抖肩。

呢個畫面，被網民一致評為「膠」到唔敢睇的系列，簡直是繼關家姐後又一力作，膠到唔敢睇的一幕，而今次內容更是相當驚嚇。鏡頭影住Louisa、Crystal同陸浩3位主持話要同現場的歌手一齊Jam下，跟住就出晒事喇！音樂響起，3位就側身紮馬起勢地un，姿態極難睇，明明人哋跳抖肩舞只是抖肩，不用un身un勢㗎囉。Crystal仲要一臉興奮咁話：「呢個抖肩舞我想玩好耐㗎喇！」媽呀，救命呀，跳得咁肉酸唔覺得醜的嗎？Rap又rap到甩晒beat，內容又膠，網民仲話他們un到似痙攣，總之成個晝面就好恐怖，好趕客啦。之後他們仲要搵歌手一齊rap，何雁詩窒一窒都接唔到，坤哥直情連抖都費事抖，JW都一臉尷尬。要做啲咁騎呢嘅嘢，作為觀眾睇到都戥他們慘呀。