【誇極限大挑戰】簡淑兒跑障礙賽泥水潛行　女神凍到震好搏命

簡淑兒（Jessica）擁有一雙電力十足的腰果眼，近年歌視兩棲發展，在電視劇《愛．回家》及《迷》獲得不少注目，隨即獲「宅男女神」、「仙氣女神」、「笑容令世界停止」等稱號。
 

簡淑兒雖然睇落嬌滴滴，不過早前佢就聯同黃美棋、胡諾言去到東京參加「斯巴達障礙賽」（Spartan Race），6公里的賽事包括泥漿、火圈、石牆、鐵絲網等20多個障礙，考膽量之餘更考體力，其中一項挑戰，就要以30burpees（類似俯臥撐的進化版）代替，大台節目《誇極限大挑戰》將女神參賽過程全直擊。

出戰當日，天公不造美，遇上颱風吹襲氣溫急降12度，但簡淑兒都好順利咁完成頭2公里多個攀牆的項目，直到去到泥漿位，由於需要潛入泥漿以橫過巨牆，令女神遲疑了一下子，但說時遲那時快佢已一口氣潛入泥水當中，真係少啲勇氣都過唔到。經過4公里賽事之後，只見兩女已疲態盡現，搬運30公斤的鐵球時，黃美棋更整親手指，腫脹如乒乓波，但最終都順利完成所有項目。

不過，衝線之後，二人接受訪問時，只見女神依然全身發抖，真係見到都心痛。對於今次的極限挑戰，簡淑兒就話：「好少會見到藝人一身泥咁出現，但比觀眾見到都好，因為藝人都會有邋遢難睇一面，更有真實感。」她更透露返到酒店之後，用了一個多小時清洗，但所有衣物都要報消。睇完呢個節目之後，相信簡淑兒好快又多個「鐵人女神」的稱號。