【我本善良】溫兆倫「戴綠帽」原播Beyond 版權問題改播林峯仲正

撰文:李妍樺
出版:更新:

大台深夜時段原來已經播完神劇《壹號皇庭》Season5,接力播嘅係1989年同樣係神劇嘅《我本善良》,由溫兆倫、曾江、邵美琪等人主演,溫兆倫同曾江好戲就唔使講,入面做Diane嘅黎美嫻好Pure好True真係好正,但呢個都唔係重點,今次係講尋日嗰集溫兆倫同Diane準備拉埋天窗結婚。

【我本善良】Diane黎美嫻當年被稱「古裝皇后」 息影後主力慈善

改由《我本善良》接替《壹號皇庭V》 溫兆倫演齊浩男極為經典

修哥超後生!但呢個唔係重點。(網上截圖)
溫兆倫同Dinan呢Pair最好睇!(網上截圖)
+5

本身結婚係一件開心事,但原來溫兆倫冇同Diane商量過,所以Diane就覺得好唔受尊重,仲發脾氣話:「你會係嗰種派晒帖畀所有人,然後先嚟話我聽我係新娘嘅人,可惜我哋仲未去到呢個階段。」之後就上的士走咗去,溫兆倫當然死跟啦,點知最後好狗血咁見到Diane竟然飛的係搵其他男仔,仲要手掂掂咁,係呢個咁「綠帽」畫面,本身就係播Beyond嘅《原諒我今天》,歌詞入面一句:「要是緣份妳相信/最後仍然是一對/心底裡從未告別/只有默然滲著淚」,大家可以幻想吓幾好feel。

點知大家聽到嘅竟然係林峯《愛不疚》,雖然就冇林峯把聲,但完全冇違和感,「放手/放開所有/彼此更自由」,成件事仲更加Sad,套劇89年播,林峯08年先唱《愛不疚》,回到過去19年,估唔到咁都可以玩到穿越。成集播足3次《愛不疚》,本身好悲傷氣氛突然變咗陣膠味,不過都好,曲線成為網民熱論話題,咪當宣傳囉。事後我哋搵到TVB外視部了解原因,原來係因為歌曲版權問題,所以轉咗歌,睇嚟之後仲會有好多「穿越歌」出現,估唔到要睇《我本善良》先至可以再聽到林峯嘅歌。

+4
林峯首《愛不疚》亂入完全冇違和感。(視覺中國)