81歲余慕蓮後生堅索 唔會返TVB拍劇：要捱更抵夜太辛苦喇！
撰文：張嘉敏
出版：更新：
余慕蓮81歲依然未有退出幕前。
入行演戲逾60年，所演角色大部分都是醜女或丑角的余慕蓮 (余毛姐)，在鏡頭前似乎從來都無靚過，近日有網民重溫一張她少女時代的黑白照片，相中的她輪廓突出，成個小淑女咁，不少網民都大讚她長得好似混血兒咁靚女，又話估不到她少女時的樣子曾經咁標緻。香港01記者就電話訪問了余毛姐，現年81歲的她依然非常好記性，她說：「呢張相係我11歲時拍緊電影《臨老入花叢》影嘅，呢套戲係梁醒波第一部電影，佢演我老豆。我阿媽係做電影，所以我細細個已經成日跟佢入片場，做下啲特約演員。」
就係呢張相被網民激讚喇。
對於網民讚她年輕時靚女，余毛姐笑言多謝大家支持，提到從影多年所演的幾乎都是一些醜/丑角，她竟然說：「好呀，咁先無人同我爭吖嘛，唔係點畀我喺呢行做到成60年呀，以前我做無綫劇集《真情》個秘書都幾靚吖。我唔介意自己唔係做靚女㗎，我鍾意演戲之嘛，最緊要觀眾鍾意睇。我覺得自己好有觀眾緣，依家出街都會有人走埋嚟叫我，話好耐無睇我做戲喇。」余毛姐果然十分豁達，仲話作為演員可以令觀眾睇她的戲睇得開心就夠，還笑言：「我登台嗰時咪可以靚囉。」
佢話最緊要觀眾鍾意睇佢同埋睇得開心。
已經81歲的余毛姐身體仍很健康，亦繼續幕前的工作不言休，除了演戲，也經常去登台，例如會同舊拍檔盧海鵬、羅蘭和胡楓等一起登台演出EYT之夜。她說：「托賴身體無病無痛，早前先去完吉隆坡旅行，嚟緊會去新加坡登台，順便去玩下，我好鍾意去旅行，趁仲行得走得四圍去下。」而拍戲拍劇方面，她一定不可以太辛苦的：「我依家自由身，有幫奇妙電視同ViuTV拍劇，我唔簽長約喇，可以揀嘢嚟做，唔係為錢嘅。(會唔會返TVB拍劇？) 梗係唔返啦，要捱更抵夜，TVB之前都叫過我兩次，我話好多謝佢哋，但我年紀大捱唔住喇。樂小姐 (樂易玲) 幾年前都有問過我點解唔簽長約，我份人鍾意無牽無掛。」
佢早前仲同范冰冰合作。
佢話以佢一把年紀返TVB拍劇太辛苦喇。