陳奐仁健身原來為健康 十個月操肌生涯：日日都食薯片
撰文：洪曉璇
出版：更新：
近年個個男藝人都話要操肌，一個二個變晒筋肉男，本身骨感如黃又南早前演唱會都變咗做大隻仔。陳奐仁３月１２號上載一段短片，赤膊玩戰繩ＳＨＯＷ出一身肌肉，胸肌二頭肌三頭肌乜都齊，大家熟悉嘅肥嘟嘟Hanjin去咗邊呀﹗到底咩事令陳奐仁的起心肝大變身？佢接受香港01訪問時透露：「都係聽醫生話。」
去年11月時陳奐仁手臂仲係相當鬆弛。（陳奐仁Facebook）
陳奐仁呢條短片真係嚇親唔少人。（陳奐仁IG）
要由肥嘟嘟變到成身肌肉，Hanjin花咗足足十個月時間去健身鍛鍊，起點源於遇到佢嘅學習對象兼教練：「做身體檢查發現內臟脂肪過高，醫生話唯一一個方法，去減低皮低脂肪就係做運動。通常人地覺得減肥要做Cardio（有氧運動），但只做Cardio的話，短期內減好多脂肪亦削減肌肉size。人嘅肌肉減少就令消脂能力愈來愈低。所以如果想長期去減脂肪，就一定要加上另外嘅訓練。因為我嘅教練以前試過打籃球整親ACL（前十字韌帶斷裂），佢覺得操還操最緊要係唔好受傷，如果唔係就無得日日鍛鍊。」
以前肥嘟嘟嘅Hanjin，同阮兆祥兩兄弟一樣。（阮兆祥微博）
Hanjin喺訪問中多次感謝佢嘅教練Lawrence：「之前試過自己行下做下運動係失敗，好在遇到遇到一個好教練Lawrence黃家灝，佢唔係藝人，係三項鐵人。」跟住個咁利害嘅教練，操嘅時候會唔會好地獄無啖好食呢？「舊年７月起完全無節食，食嘅嘢無變過仲要食多咗，照食薯片，日日都食，飲可樂飲奶茶。」嘩想羨慕死人咩﹗
Hanjin真係相當勤力，有成果係應得嘅﹗（陳奐仁Facebook）
當然啦十個月當中都有無數次痛苦想放棄嘅時刻，Hanjin亦坦言自己要比其他人付出更多先有今日嘅成績：「（最難捱係邊個位？）痛同無進度囉，特別我係肥底，如果係瘦底好似操到成果，起碼睇得出瘦番，但因為我係肥底，所以要俾多一倍付出先得。」
雖然肥底係難減啲，但Hanjin身體力行話俾大家知，有恆心一樣做得到。（陳奐仁Facebook）
+3