【飛虎之潛行極戰】黃宗澤唱插曲 真係有驚喜:最緊要大家開心

撰文:陳栢宇
出版:更新:
Bosco隔咗咁多年再唱歌係同吳卓羲合唱,但我諗大家想佢獨唱多啲。(陳順禎攝)

大家除咗覺得TVB爭黃宗澤(Bosco)一個視帝獎座,仲覺得佢嘅歌藝好出類拔萃,好想佢可以出多啲新歌,再以聲音感動聽眾。當大家以為要等多三五七年時,Bosco就默默地為歌迷製造驚喜,更在邵氏網劇《飛虎之潛行極戰》發佈會中,公開佢同吳卓羲合唱嘅劇集插曲MV,驚艷全場。

Bosco話佢唱歌都係想大家開心。(陳順禎攝)

Bosco接受《香港01》訪問笑謂:「老細叫到我唱,冇話肯唔肯嘅,我呢啲唱插曲嘅都係hehahae啫,最緊要係大家開心。其實本應係三哥(苗僑偉)唱,但佢唔肯。如果佢肯,阿峯(林峯)同MC Jin唱嗰首點會係主題曲。(唔怕網友瘋狂討論?)冇問題啦,又唔係攻擊你,最緊要大家開心。」

Bosco對時裝有自己嘅睇法。(陳順禎攝)

其實除咗Bosco嘅歌聲,佢嘅衣著風格都係走在潮流尖端,令網友非常關注,盛讚只有佢可以Carry到。今日,佢就以紫色衫褲到場,先後外搭黑色、卡其色兩件長褸,好有層次感。與Bosco探討衣著品味時,他直言:「我就係咩都夠膽試!個個都西裝、打呔,依家我咁著,大家都多樣嘢講下吖。(鍾意?)我接受架,我屋企都有唔少裙,褸都會買女裝,但要著就睇場合。」至於咁著熱唔熱?他即逐層逐層揭畀大家睇:「裡面冇嘢、假架,一啲都唔熱。」

Bosco話佢咁著唔熱,仲揭起自己件大褸畀大家睇裡面係點。(陳順禎攝)
+2