【逆緣】金牌監製王心慰出奇招 陳家樂做黎耀祥阿爺：貪佢夠正氣
撰文：陳栢宇
出版：更新：
曾打造《烈火雄心》系列、《梟雄》的無綫金牌監製王心慰（Amy姐）一向都係質素保證，而佢監製嘅新作《逆緣》亦將會喺下個月初正式首播，黎耀祥、姜大衛等演得之人孭起套戲固然令人期待，但最令人覺得新奇始終都係搵咗平時拍開電影嘅英皇藝人陳家樂演出，仲要係飾演姜大衛老竇，即係黎耀祥阿爺。嘩！Amy姐呢步棋真係行得幾妙。
金牌監製王心慰為無綫搵到拍開電影嘅陳家樂拍新劇《逆緣》，仲要係飾演姜大衛老竇、黎耀祥阿爺，其實呢著真係行得幾妙。（江智騫攝）
點解會搵陳家樂呢？Amy姐就話貪佢個樣夠正氣：「好Fit做1945年啲游擊隊，個樣好講仁義道德嗰隻。（但無綫親生仔都有呢類喎！）本身角色安排已經好新鮮，再用埋外援成件事會再出啲再搶啲。（唔睇價錢咁請？）最緊要件事係正，我從來唔幫公司慳荷包！」又話出到嚟效果好，會繼續搵陳家樂嚟無綫助陣。
王心慰盛讚陳家樂個樣夠正氣，似足成日講仁義道德嘅抗日游擊隊。（江智騫攝）
Amy姐現時亦正籌備另一套新劇。新劇會唔會搵其他外援？佢就話未定，但有都唔出奇：「講返家樂，其實佢真係好快上手，始終係後生仔，好快就適應到。不過，我喺開拍一個月前就嚇鬼陳家樂，叫佢不斷睇粵語長片，學幾十年前嘅人講嘢嘅神韻，結果未埋位、淨係試造型已經好入戲。」
王心慰又讚陳家樂好快上手，未正式埋位已經好入戲。（江智騫攝）
+3