黃子雄成無綫「御用有錢人」:編審唔畀我做草根角色!

撰文:林通賢
出版:更新:
黃子雄為無綫御用有錢人,多做老闆、董事長、太子爺,在《愛‧回家》飾演查家澤相當搶鏡。
重提一次,現實中黃子雄唔送花的,亦不愛在節日中送禮物,非一般有錢仔,雖然佢唔認有錢。

黃子雄(Geoff)的送花論及對情人節的觀點,簡直道出天下間所有男士心聲(花店東主除外),在無綫前後13年的他,代表作有《同事三分親》Vincent(細言生)、《愛‧回家》的查家澤及正在播的《乘勝狙擊》三舊石,多演有錢仔或專業人士,簡直是御用上等人,其實他是無綫筍盤眾所周知,不過Geoff就謙虛說自己不是,他接受《香港01》訪問時說:「有錢仔?唔敢當,我會講自己嚟自一個中上家庭,用比上不足、比下有餘嚟形容啦,應該冇錯,呢句中文我學咗好耐,哈哈。」

「細個OK啦,有得去外國讀書(倫敦國王學院畢業主修Food Science and Management),返到嚟嘅工作都俾到我經濟上嘅支持,我返到嚟冇問過媽媽攞錢㗎,有一個舒服的生活,想買嘅嘢我係買到嘅(小編即聽到嘩嘩聲),唔好嘩住先,咁兩三架法拉利我梗係買唔到啦(咁買一㗎囉?),但我唔會嘥錢係呢度囉,一架車係消耗品,雖然我買嘅車都唔係太平。唔係大家想像中咁富裕。」聽到黃子雄這麼說,相信大家都心中有數吧。

黃子雄同現任女友前無綫藝員夏竹欣拍拖8年,二人感情穩定,但拍拖生活簡單,絕不奢華。

黃子雄母親開辦出版社,他從英國回流先在利樂公司Tetra Pak當marketing三年,之後有位親戚介紹他到明珠台當主持,之後黃子雄得到戲劇總監曾勵珍賞識,找他演長篇處境劇《真情》劇組,當時拍檔是鄺美雲,這就開始了黃子雄的演藝生涯。

 

黃子雄幾乎所有角色都是有錢人,就算在《乘勝狙擊》飾演三舊石,都是有錢的壞人。

從演超過22年,黃子多演配角,不是親生仔(無綫經理人合約)的他亦明白遊戲規則,不會在頒獎禮出現,他說:「我係一個極低調嘅人,我只係enjoy拍戲嘅過程啫,我鍾意同人合作,將劇本變成一場戲,成場戲做得好,唔使睇個人我就好enjoy㗎喇,我係為呢樣嘢㗎啫,有冇獎唔重要(唔想攞獎咩?頒獎禮坐下都好?),唔會,絕對唔會,我寧願做其他嘢,唔係唔想攞,係根本唔會諗,遊戲規則我都唔係太遵守嘅時候,我點會有機會去玩?」

黃子雄睇得化,但不代表hea,他是有火的,他說:「我會同一啲冇睇TVB嘅外國人講,我係Bryan Cranston before 《Breaking Bad》,Bryan Cranston拍呢套劇之前,其實佢喺《Malcolm in the Middle》呢套處境喜劇做老竇嘅,好多電影、電視都會出一出,過下鏡,好多人認得呢位演員,但講唔到佢嘅名,直至《Breaking Bad》嘅出現,佢就街知行聞,我可能都係咁,有人知我成日拍戲拍劇㗎,但未知我咩名,我都等緊我嘅《Breaking Bad》出現,啲人就會知道我係黃子雄喇。」

黃子雄表示不會買法拉利,但自己架車都唔平,不過唔係圖中這架。

但黃子雄未有《Breaking Bad》出現前,都想演技有突破,就是嘗試一些草根角色,可惜,無綫編劇不肯,他說:「有次我同一個編審傾偈,我同佢講下次俾個做一個草根角色啦,編審話唔得,因為嗰劇入面呢,有另外一個老闆角色,佢話俾我做草根,就算幾努力去演,觀眾睇落去,你點都唔係咁草根喎,跟住班觀眾就會睇埋個老闆角色,咦!呢個應該係黃子雄做喎,咁就會一次過殺死兩個演員,我都明白,我嘅戲路係狹窄咗啲。所以今次喺《乘勝狙擊》做奸角,我係好開心。」無論現實或戲劇上,黃子雄都是想窮都難,真是幸福的煩惱。