TVB《最緊要好玩》好難笑得出 網民：睇十分鐘頂唔順
莫講話做棟篤笑，有時與朋友食飯講幾句笑話，都怕大家聽完dead air，搞僵成餐飯的氣氛。有人話講笑話唔好笑的自救方法，就是自己笑咗先，起碼不會這麼尷尬。不過，這種情況都頗讓人不堪回首，如果這種畫面搬上電視，又會係點？如果想試下，不妨睇睇TVB的最新「搞笑」節目《最緊要好玩》。節目出街之前，有網民事前都抱有期望，睇下有幾搞笑。可惜出街之後，有網民就話：「睇咗十分鐘頂唔順」，更指出節目的不足之處：「呢個世界真係行得好快，過咗就已經唔好笑。」見到評價如此，記者就親身睇下這個節目賣甚麼藥。
節目一開首，就有扮周星馳聲線扮到出晒名的溫超聲音演出，配上外表尚有喜感的阿Bob打頭陣，示範「特異功能」，就係用自己方法拗曲所有手指……唔，真係笑唔出，所以即刻加了笑聲罐頭音效自救，正正是開初跟大家講到，「唔好笑就自己笑咗先」，這算是講笑話時最不堪的場面。
其實節目有好受大家歡迎的麥美恩，見到她理應會好開心，但對的人配錯的劇本，都會令人吃不消。麥美恩化身「港女怪」，重演早幾年熱話「十四巴港女」，不停摑阿Bob，係就係用心良苦，下下都似真打，但係未有笑的空間。而阿Bob其後模仿日本動畫《一拳超人》做「一團超人」，以超緊身黃色超人look示人，似乎也不能為這場戲加半點分數。
除了「十四巴港女」，網民話節目脫節也不是沒有原因。其後有幾位「小學雞」唸新詩，講到「雞，全部都係雞」，今年是雞年，確實幾應節，但後來玩埋諧音：「話人屁股好大，就係『股巨雞』（古巨基）。」可是笑話被濫用的話，時間很容易因此被凝結。
雖然唔太好笑，但都有網民能夠睇畢全集。講到節目其實有誠意，表示：「慢慢嚟呀，現在TVB 冇乜人handle搞笑節目，人材也缺。」算是點出問題核心，略嫌點子有點舊，呈現方式與九十年代的趣劇大同小異，「古老當時興。」如果TVB要做搞笑節目，看來還需要點時間摸索現今的笑點了。