【御用健身教練】港男Rocky神級木獨表情有出路：至少睇得舒服！
如果講TVB有位演員叫鄭健樂，你可能會問「邊位呀佢？」？但講佢英文名Rocky，就一定即刻講「哦，嗰嗰香港先生呀？」入行12年嘅Rocky，雖然無乜代表作做嚟做去都係性格木獨兼經常被人揾笨嘅健身教練，Rocky就話TVB導演就係睇中呢一點，「佢地反而鍾意我夠自然！」
經常被網友揶揄表情生硬嘅Rocky，好在生硬得嚟都幾搞笑，有不少網友都話煲劇都係為咗佢，原來Rocky都有睇過啲留言，「見仁見智啦，大家可能無留意到係因為我啲角色性格係木獨。但我性格完全唔係咁，好想試下其他角色，越極端越好！」但TVB導演反而愛Rocky木獨，「佢地反而覺得我咁樣做幾好，仲話如果唔係我做就唔係嗰樣嘢。有啲網友話我肢體動作進步左，但就唔似佢地鐘意睇個個rocky，都唔知開心定唔開心。」咁跟佢學做Gym嘅學生有咩評語呢？Rocky就話，「覺得我自然唔做作，雖然唔係精湛嘅演技，但至少睇得舒服。」
提到經常被安排飾演大隻佬，會否感到無奈？Rocky直言是有些沉悶，「觀眾唔厭我都厭，嚟嚟去去都係咁，但起碼有樣嘢揸係手，一講TVB大隻佬觀眾就記得我。」他指大隻佬演員在香港的市場，角色性格永遠都是蝦蝦霸霸，仲用羅莽、吳剛師父為例，「點解唔可以好似外國咁，例如史泰龍電影中旁邊身型都大大隻隻的手下，雖然無咩對白，全部好型好cool好man。香港嘅大隻佬只能做惡人，好似已經被定型咁。其實我都好想好似史泰龍咁有型！」
拍過接近50套劇集嘅Rocky，他透露最滿意是2014年的《飛虎2》，因為不用再做健身教練，「我係劇中飾演飛虎隊隊長，講嘢要好命令式，嗰tone完全唔同。當時接到呢個角色我都去有特別練下對白。」但其實TVB入面，要數身型大隻佬嘅演員，又真係好似得Rocky一個，所以就被定型位為「御用健身教練」，而現實生活中佢的而且確係一名「健身教練」，同舞蹈大師Sunny Wong合作，更將Bootcamp(美國海軍陸戰隊集中訓練營)健身模式引入香港，返TVB拍戲只不過是副業，「其實現實中教人做運動係唔會好似劇集咁講嘢，同埋我係著風褸而唔係著背心教做gym。」