【01眾故事】 陳奕迅(上集)《L.O.V.E.》險難產 出實體碟為啖氣?

撰文:
最後更新日期:

陳奕迅(Eason)即將推出新專輯《L.O.V.E.》記錄與DUO Band八年情,專輯由各成員一人一歌結集而成,對DUO Band及樂迷來說也是相當有份量的禮物。今時今日Eason堅持出實體碟,是為啖氣?還是為了延續那份能緊握在手的溫度?

攝影:黃寶瑩

今時今日買實體碟為乜? 「係為咗儲起個回憶!」

面對時代洪流,樂迷聽歌習慣改變,智能電話已取代CD機,甚至大型唱片店亦相繼倒閉,到底今時今日出實體碟是秉承傳統還是「執迷不悔」呢?Eason直言:「重點唔係在於仲有幾多人買碟!仲會買碟嘅朋友係想儲返呢件事,係一個紀念品,有幾多人有CD機吖依家?」的確,實體載體逐漸被電子產品的便利取替,但市場仍然有人反其道而行,正因為實體載體有一份無法取代的溫度。

無論環境如何改變,Eason做音樂的心態依舊:「我哋都係咁做音樂,係一個好大嘅興趣,係奢侈㗎!但我又唔識做第二啲嘢,而且呢樣嘢係做得最好嘅,仲有咁多人陪你一齊癲,只不過係銷售方法唔同咗之嘛!」

不論市場,還是樂迷的聽歌習慣改變,Eason做音樂的心態依舊,實體碟盛載的是一份有溫度的回憶。(黃寶瑩攝)

一次個拎住三十幾隻碟嚇親張學友 「我係有買碟情意結!」

相信大家也能體會到Eason對實體碟的熱愛,他更分享一個向偶像張學友「挑機」的小故事。有次Eason一口氣帶三十多張CD給學友簽名,他回想起也忍俊不禁:「我都幾唔好意思,因為一次過要簽晒三十幾隻都幾甘!哈哈!」Eason更問學友是否清楚每一次專輯的推出順序,豈料對方神回一句:「呢樣嘢你唔夠我熟㗎喇!」然後有條不紊地逐一排好次序。Eason回想起那時情景,大讚學友的記憶力:「所以佢咪係我偶像,我連呢樣嘢都學埋佢!哈哈!」

Eason視張學友為偶像,就連牢記出碟次序這個細節也學到十足十。(黃寶瑩攝)

受David Bowie、Prince啟發 《L.O.V.E.》爭啲變「隱世」專輯?

有留意Eason的樂迷都知道,《L.O.V.E.》專輯基本上在2013年已完成,經歷種種原因才於今年推出。原來他差點效法英國傳奇歌手David Bowie的做法,將專輯留待離世後才推出:「大吉利是講句,如果我有病,我就會好似David Bowie咁plan。當時佢出完《Blackstar》之後兩日就過咗身,佢係用呢張專輯向大家say goodbye。所有嘢佢都plan好晒,真係好勁!」

Eason豁達說:「《L.O.V.E.》本來有呢個意味,反正遲遲都未推出,咪等遲啲先出囉!好似Prince咁,留待佢死後大家先發現佢有咁多歌未發表,只係冇得現身宣傳咁解啫。」每當談及生死,都會有讀者覺得「大吉利是」,但Eason這番話更令讓大家了解到,他做音樂並非「為做而做」,而是單純地出自喜愛,《L.O.V.E.》的精神能超越時間延續下去。

想繼續了解更多陳奕迅最新近況,亦要密切留意稍後發佈的【01眾故事:陳奕迅】下集。

陳奕迅髮型:Derek Li@Xenter
陳奕迅化妝:Karry Wong
場地提供:柏寧酒店

下載《香港01》App,打開App首頁,撳「+」選取「01眾樂迷」做你嘅「已選頻道」,每日都睇盡【01眾樂迷】精彩內容啦!

即睇 【 01眾樂迷專屬頻道

 



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。