30年屋邨髮型屋捱不住貴租將結業 熟客婆婆與老闆對話超心酸

撰文:
最後更新日期:

近年不少屋邨商場小店,因領展加租加到難逃結業命運。日前一名網民在網上發文,指到屋邨商場內一間屹立約30年的髮型屋準備剪髮時,聽到老闆跟一名熟客婆婆的對話,令他感到非常心酸。該老闆表示,髮型屋因捱不住貴租,將於9月結業,而光顧多年的婆婆亦快將住進老人院,老闆聽罷,提醒婆婆臨搬前一天到髮型屋,他可免費替她洗頭。

樓主慨嘆「呢個社會真係好悲哀」,認為不少老人家被家人忽略,良心小店亦被淘汰,「周街都係垃圾連鎖鋪 」,寄語網民多關心身邊「為生存而努力」的老人家及小店,「唔係等到上晒電視話就執先去打個卡」。

巿民光顧髮型屋而成為熟客,當然不捨得店舖搬遷,但近年不少屋邨髮型舖因捱不住貴租而結業。示意圖。(資料圖片)

下載「香港01App ,即睇城中熱話:https://hk01.app.link/qIZYuEC5LO

該網民昨日在連登討論區以「頭先剪頭髮 聽到老細同個熟客傾計好心酸」為題發文,稱這間髮型屋在屋邨商場內屹立約30年,專門做街坊生意,她等待時,見到一名熟客婆婆找老闆,表示因沒有家人可以照顧她,她快將搬進老人院,而老闆亦稱髮型屋租約至12月,雖然未跟領展洽談租金,但附近的補習社卻被瘋狂加租4成,「做唔住喇,租金太貴 」,坦言即使領展不加租也未必捱到,「再加租我更加唔使做」,所以髮型屋將於9月結業。

眼見離別再即,老闆着婆婆臨搬前到髮型屋找他,「星期幾都冇所謂,我幫妳洗個頭,唔收妳錢!妳幫襯咗咁耐,我都唔捨得妳」,又安慰婆婆稱搬入老人院是好事,「有人煮野妳食、照顧妳」,更提醒她要多走動,「唔好剩係瞓喺度」。婆婆聽罷非常開心,跟老闆互相道謝。

領展商場翻新後往往大幅加租,小商戶難捱貴租。(資料圖片)

樓主坦言聽到二人對話非常心酸,得知婆婆原來不想搬進老人院,慨嘆老人家有子女,有住慣自己屋企,「邊有人想去住老人院,畀一班可能係冷血嘅人照顧」,惟香港政府對長者的支援卻不足夠。樓主補充事後婆婆的女兒來接她,當老闆提起洗頭一事,女兒卻表示「未必有時間」,令樓主更加心酸,「政府又理唔到班老人家,仔女就為賺錢生存而忙到冇時間」。

樓主慨嘆「呢個社會真係好悲哀」,雖然屋邨商場歷史悠久偏殘舊,人流亦不算太多,「但都加(租)40% 真係就算有心做都無奈地要放棄」,而且小店做開街坊生意,領展根本不會理會他們跟熟客之間的感情,「於是就愈來愈多有人情味嘅地方要逼住消失」,良心小店被淘汰,「周街都係垃圾連鎖鋪 」,只剩下做內地人及有錢人生意的珠寶行。

搬進老人院雖有專人照顧,但要離開身處數十年的社區,長者亦會不習慣。(資料圖片,非當事人)

最後樓主亦寄語網民多關心身邊「為生存而努力」的老人家及小店,「唔係等到上晒電視話就執先去打個卡」。

帖文引起大批網民熱議,超過7600個讚好,紛紛留言表示唏噓又無奈,「呢啲事就係日日都喺唔同角落發生緊,當睇得多,就自然麻木晒」。有人則指舊式小店的人情味及感覺很舒服,是連鎖店永遠不能做到。不過,有網民亦認為入老人院未必是壞事,因有部分長者的家人不願照顧,甚至不會探望,「去老人院起碼有人照顧,有啲老友記打下牙骹」,惟有人批評香港的老人院質素參差,「入中間伏嘅就絕對衰過原本嘅生活」。

(連登討論區)

立刻Like!讚好《01熱話》:


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。