【騎牛出城】新界西五大絕望真相 90後撰文者:偏愛天水圍的寧靜

撰文:陳嘉欣
出版:更新:

有一種距離,叫新界西和香港島,這麼近,那麼遠。
近日,一篇網絡文章【絕望真相】《新界西人絕對係一群堅毅既物種》,作者以自身經歷抒發家在新界西的感受,引起不少網民共鳴。
《香港01》訪問90後作者逆行,雖飽受來回新界及港島的折磨,但他坦言,自己仍熱愛這片樂土,遠離煩囂自有好處。

「新界係咪仲有好多人養牛㗎?」新界西人總是笑而不語。最近有網絡文章,出自90後手筆,內容盡數新界西居民「出城」的苦況,甚至形容住在新界西,算得上是都市傳奇。《香港01》歸納文中提及的5大絕望真相:

1. 時差不一定存在於國與國之間,新界人永遠早出晚歸

當大部份返九六嘅奴隸仍然在夢裏邊暢遊,住新界嘅可憐蟲已經喺巴士站,迎著寒風作出無盡嘅等待。
當你辛辛苦苦捱完條長青或者大欖隧道,你面對嘅仍然係一片荒蕪,貨櫃碼頭?高速公路?如果突然內急,你連搵個廁所嘅機會都冇!

2. 逼地鐵?企位都未必有

「搭地鐵啊嘛!」就好似叫你等多班車或者努力增值下自己一樣,難聽過粗口。
西鐵嘅兩個站,同地鐵嘅兩個站,係唔同嘅。
朝早8點去到錦上路你仲上到車,同元公或者屯公冇塞車一樣,已經好似李斯特城贏到英超咁興奮。

3. 日日夜夜鍛煉腳骨力

啊媽話以前見工聽到你住新界西,一定唔想請,但如果我係僱主,知道有新界朋友嚟見工,無論公司喺邊我都會請。因為經過住新界嘅磨練,呢位員工仲有咩克服唔到?
你話OT辛苦,份工要成日企,有咩辛苦得過由7點45分企到8點45分而駕車仲不斷搖嚟搖去,個腳力已經升到S級。

4. 夜晚放工才是新界人最大的考驗

你可以試下問住新界嘅同事,佢哋有幾耐無睇過《愛回家》。
據非正式統計,新界西人睇MyTV嘅比率應該係最高。歐洲美國有Winter Time,香港工時根本就應該有新界西Time。

5. 同人唔同命

如果喺返工之後有gathering,更加係煎熬。當住九龍港島嘅朋友返到屋企沖哂涼上埋床,住新界西既朋友可能仍然喺美孚或者尖東行緊嗰條為競步賽而設嘅走廊,亦可能喺大欖隧道駕巴士入面企緊。

文末提及,「住新界又要到港島工作,就正正經歷著猶如貧富懸殊嘅鴻溝,社會不平、M形建構嘅壓抑,望著太古城和港景峰的同事,你無言以對」。新界西人每日奔波勞碌,就如同作者最後絕望地形容「自己就係牛」,引起不少逾千網民讚好,其中有網民留言呻苦:「八達通好似永遠充唔夠錢咁!」

90後作者逆行 : 《新界西人絕對係一群堅毅既物種》正是自己所見所聞

文章來自facebook專頁「電視汁撈飯」,90後作者逆行接受《香港01》訪問,他表示,《新界西人絕對係一群堅毅既物種》正是自己所見所聞,最近聖誕節出街時,突然有感而發。畢竟自小在天水圍長大的他,讀書、工作、約見朋友,都是九龍及港島區,早起、塞車對他這類「新界西人」是折磨。

由於每日千里迢迢進出新界西,他習慣留意車廂內的乘客行為。他憶述,一次目睹有乘客在座位上熟睡,可能當時太累,整個人跌落走廊上。看似誇張,但新界西居民正是背負著每日在車上煎熬的命運。

猶記得當年歌手李克勤一曲《天水圍城》,被指「唱衰天水圍」。逆行用「絕望」形容新界西居民為生活而奔波的境況,又是否不滿居於偏僻之地?他立即否認,相反,他多番強調自己喜愛天水圍的寧靜、空氣清新,在香港難以找到這片淨土。

相比起遠距離的折磨,政治動盪、貧富懸殊才最令年輕人感到絕望

雖然居於新界西,就要承受時間空間折磨,但他認為,時下政治動盪、貧富懸殊,才是令人感到無助的根本問題,特別是年輕人都會對上流感到絕望。他作為年輕人的一份子,亦希望:「大家在自怨自艾時,唔好就咁就算,對自己好啲,就要想辦法去做!」他引述漫畫《男兒當入樽》的金句:「如果你放棄的話,比賽就到此結束了!」

住喺新界西,去邊都要1粒鐘,但我唔想搬走,因為我鍾意天水圍好靜、冇乜人。
作者逆行

延伸閱讀:
【轉載】新界西人絕對係一群堅毅嘅物種