【Send錯短訊】爸爸發錯色情內容到家長群 專家、網民教3招拆解

撰文:
最後更新日期:

有爸爸send錯含色情內容訊息到小學家長群組,有關WhatsApp截圖網上瘋傳。其實「send錯group」事件時有發生,有親子、升學專欄作家表示「大人笑還笑,小心影響到個細路」,擔心小朋友會受事件影響。

爸爸send錯色情訊息到小學家長群組的WhatsApp截圖(左圖)於網上瘋傳一日後,再有截圖流出,顯示該名爸爸其後向群組內家長道歉,同時暗批有人將內容公開。(網上圖片)

小學家長對話截圖,昨日(19日)在網上瘋傳,有家長正在分享子女患外耳炎,大家正在表示祝福之際,其中一位爸爸竟回覆「HJ兩Q,XX都損」,疑似色情訊息,該爸爸其後知悉犯錯,即時補句「Sorry send 錯」,但事件一發不可收拾,附有子女名字,就讀學校的對話截圖在社交網及討論區瘋傳。

直至今日,該名爸爸疑似再在群組道歉及解釋,他指不會交代有關訊息內容,但「希望大家都留意,你哋完全無遮小朋友同學校嘅名……宜家網民咁鍾意網絡公審……希望大家post嘢上forum(討論區)前,諗清楚件事會發展到點」。

曾任曾俊華競選團成員的親子專欄作家梁永樂(左)表示,「大人玩還玩,唔好搞到個細路,個細路都唔知自己做錯啲乜」。(「八爪魚家長」facebook圖片」)

曾任曾俊華競選團成員、「八爪魚家長」專欄作家梁永樂接受《香港01》訪問時表示:「我啲group直情有收到冇打格原圖」,小朋友的名字及就讀學校一清二楚,放上網之後「有人不斷欺凌取笑個家長,變相係傷害緊個細路」。

專家:瘋傳變相害小朋友

梁永樂認為「online to offline先係最大件事,唔好以為啲小朋友唔知咩事」,我們可以控制小朋友上網,但不能控制別人的說話,「個小朋友仲要返學,即使有高年班同學,有意無意手指指講句『嗰個咪係囉』,個小朋友都會有感受,對小朋友情緒都有影響,影響難以估計」,小三小四以上都可能有電話有WhatsApp,接觸到相關的事,希望涉事學校都可以多點觀察一眾小朋友的情緒。

梁永樂又指,家長的出發點,應先以小朋友為主,「大人玩還玩,唔好搞到個細路,個細路都唔知自己做錯啲乜」。而「send錯group」時有發生,如遇到類似情況,梁永樂教路:

第一招:即時道歉,懇請勿宣揚

梁永樂指,是次事件主角家長,當知道「send錯」都第一時間補一句「sorry,send錯」。道歉是首要的,但該名家長危機處理仍有不足,「除非係一啲好close嘅group,否則呢類大group係極有可能傳開去,尤其send錯呢啲嘢」。道歉完之後,可以再提醒大家為了小朋友着想,盡可能不要傳開去,自己圍內笑就好了,「凡事以小朋友行先」。當然,梁永樂也指「當時咁尷尬,未必諗到太多,但冷靜過後便要補救」。

對話圖在網上瘋傳,有網民亦出謀獻計,提供化解「send錯group」方法。

第二招:主動解釋免越描越黑

有網民估計,照字面看,該名爸爸很大可能是正在回覆一些損友群組,群組內有人打算光顧色情服務,才會這樣回覆。提議爸爸send錯group之後,將說這句話的背景和盤托出,免得別人「估吓估吓」,愈描愈黑。

第三招:嘗試「死兜」(非常冒險,慎選)

亦有網民指「send錯group」之後,可以嘗試「兜」去化解,以下是網民對「HJ兩Q,XX都損」的各另類解說:

個女今日竟然同我講d咁既野,係咪學校有男同學帶壞佢…...
講緊砌高達啫,HG(高達)打錯咗做HJ,Q係武器,「XX」係「龜霸」花名,「損」即係戰損(塗裝效果),意思即係盒高達「龜霸」得兩樣武器,都要玩戰損。

有網民嘗試化解色情訊息含有的英文字母解釋。(網上圖片)

爸爸唔洗驚,HJ2Q = Hanjin(陳奐仁)+ MC Jin買一送一,「XX」都損,係指首歌勁好聽,「j到XX都損」,用咗誇飾,即係聽出耳油嘅意思。


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。