港男炮製半生熟「粉紅色雞肉」　地獄廚神Gordon Ramsay被嚇窒　

雞！半碟都係生雞！地獄廚神Gordon Ramsay出名毒舌，但早前有港男膽粗粗上其節目《Culinary Genius》挑機，更成功闖入最後三強，破格在25分鐘內炮製半生熟的「粉紅色生雞」，嚇到地獄廚神一度口啞啞。

Kenneth挑戰的菜式是「蜜糖芥辣雞」，一般人會選用雞腿，但貌似「騰雞」的Kenneth卻向Gordon Ramsay表示會改用雞胸：「雞胸！我會將雞肉煮到非常濕潤，保證食落好似食緊雞腿。」地獄廚神聽到亦不禁搖頭，反問：「點解唔用雞腿？」誰知Kenneth一句神回：「咁做先畀到驚喜你！（That’s how to amaze you！）」出名嘴賤的Gordon Ramsay也不禁語塞。

來到點評時刻，Kenneth自知不夠時間焗雞，乖乖向地獄廚神自首兼溫馨提示：「呢部分有少少生，如果你想試，呢舊（肉）ok。」Gordon Ramsay再度無語。

Gordon Ramsay最後點睇？佢話：「如果雞肉仲係粉紅色，我食唔到啊！」最後更語重心長講：「如果你想雞胸食落似雞腿，用雞腿啦！」估唔到素來鍾意「侮辱」參賽者的地獄廚神竟然忍到口，Kenneth應該當自己贏了。Chef Lé Mon（謝霆鋒）可以考慮請Kenneth做嘉賓，齊齊磨刀晾意粉。

點解Kenneth冒死畀驚喜地獄廚神？Kenneth在節目中透露受Gordon Ramsay啟發先學廚，如果可以做一些事為廚神帶嚟驚喜，Kenneth坦言會好開心！主持人再追問Kenneth如果贏出比賽，會點運用1000鎊冠軍獎金（約港幣9,930）？Kenneth表示會將一半捐給聯合國兒童基金會（UNICEF），「因為這樣做，可以令他們有機會學習，並不是人人都如我般幸運可以自由學習。」主持人及現場觀眾聽到都好感動。

Gordon Ramsay 經常出席電視節目，成為煮食界名人。