【專訪】「零瑕疵」變負擔? 李克勤:球員都唔會永遠有狀態啦!

撰文:史順宜
出版:更新:

「小朋友好似足球員,要畀佢知道咩時候係黃牌,咩時候係紅牌要趕出場!」
李克勤除了是「零瑕疵歌手」外,眾所周知他是一位忠實球迷,想不到李克勤也用足球來形容與家人之間嘅關係。
攝影:黃國立
造型:Queenie Yu
化妝:Angel Y
髮型:Adolph Bow
場地:EEG

歌手李克勤將於今年9月舉行《李克勤慶祝成立30週年演唱會》。攝影:黃國立
李克勤最新專輯《30克》的唱片封套上的一條羽毛,是要表達不想給人「沉重感」。(網絡圖片)

歌手李克勤將於今年9月舉行《李克勤慶祝成立30週年演唱會》。為迎接今年演唱會李克勤花了一年時間,與監製Alex Fung(馮翰銘)製作了紀念入行30週年專輯《30克》。談到林海峰(Jan)為李克勤設計《30克》唱片封套時,曾解釋今次在《30克》封套用上一條羽毛,是要表達不想給人「沉重感」,其實是不是與李克勤工作時的嚴肅,「cool」態度有關?

「我做嘢嘅時候係好嚴肅,我係唔會笑,唔會講嘢。我係做完嘢先會講嘢嘅人。例如係我可以係又一個地方出發到另一個地方工作係完全唔講嘢。如果做演唱會的話會更加唔出聲,我係一個分得好清楚工作與私人時間嘅人。我從來當工作係一樣我好尊重嘅事情,無論係簡單一個訪問或者係演唱會也好,我係會好認真,可能係細個老豆教我工作時工作,我工作時可以連食嘅嘢都無咩所謂,只要工作完咗我可以即刻變成另一個人點玩都得。」李克勤說。

李克勤:我覺得打係無乜嘢,要畀個小朋友知道咩嘢係唔啱

工作時直認嚴肅嘅李克勤雖然話收工會變成另一個人,可以點玩都得,但翻到屋企嘅佢,都係一位嚴厲嘅「球証」:「我惡死嫁!梗係惡死啦,中國人唔打得呀!哈哈哈!點解唔可以打,我覺得打係無乜嘢,要畀個小朋友知道咩嘢係唔啱,咩嘢係好唔啱,咩嘢係好乜乜唔啱。即係要畀小朋友知道就算錯,都有分唔同程度上嘅分別,唔啱未必會懲罰,但去到好乜乜唔啱就一定要懲罰。好似足球員咁,要畀佢知道咩情況只係口頭警告,咩時候係黃牌,咩時候係紅牌要趕出場。」

(足總(老婆)會唔會嫌你處罰過嚴?)

「無哩個人(老婆)!我就係足總,哈哈哈。」李克勤笑言。

李克勤是一個公私分明的人,工作時的他會很嚴肅。 攝影:黃國立

「30」這個數字對不同人來說有不同意義,有人說是第二次青春,有人會覺得是人生十字路口,但對於入行30年經歷過高低起跌的李克勤來說,30給他的感覺,反而是心境輕鬆:「今次《30克》嘅曲風比較輕鬆,有別於以往感覺咁隆重登場及用管弦樂。今次成件事,除咗《一個都不能少》,《失魂記》等比較李克勤style之外,我都想其他歌用輕鬆心情去表達,所以阿Jan(林海峰)幫我設計唱片cover嘅時候,都用上一條羽毛,因為《30克》想畀人嘅感覺可以輕一啲。而今次《30克》同以往李克勤嘅出品最大嘅分別,就係多元化。以往嘅作品就係大家好喜歡李克勤嗰種類型嘅歌,所以我會喺隻碟入面擺好多隻李克勤類型嘅歌入去,淨番少少位我先去試新嘢。但係今次有好多歌同以好唔同。例如有《五十路》歌詞係講一架有50年歷史甲蟲車,係一首好chill好遊車河嘅歌;又例如有我同6號嘅《黑膠》,哩類型嘅歌曲你係唔係喺我以前嘅唱片搵到。」

入行雖然30年,但李克勤其實都算Keep得唔錯!
+10
李克勤的《C3PO》,找來玉女周慧敏擔任MV女主角。(網絡圖片)

談及唱片監製Alex Fung為李克勤的專輯注入不少新元素,原來AlexFung的天馬行空,正正是李克勤的所需:「我無嘢接受唔到,我只會擔心自己唱唔到Alex Fung要求嘅感覺。Alex Fung佢係一個喺音樂上天馬行空嘅人,佢可以將我自己諗嘅idea放喺歌曲上。好似《C3PO》為例,佢係一首k歌底嘅歌,但係我哋做嘅時候唔想變成個啲你愛我,我愛你嘅歌,所以我哋將『Star Wars』嘅角色放入去,而『C3PO』係一個又有人性又代表到星戰嘅角色,最後變成一首好得意嘅二次創作嘅歌曲,當然如果你係星戰迷,你會留意到歌詞上除咗C3PO之外亦都有『韓先生(Hon Solo)』,星戰入面嘅『千歲鷹』等等。」

《C3PO》由李克勤親自填詞,講真,要將C3PO放喺歌詞入面,而且仲要啱音真係唔容易。

《C3PO》歌詞:

從來不覺倦/用盡我的所有力氣照料妳/珍惜妳
如珠/如寶/如C3PO每日效勞/望到/卻觸不到

李克勤:其實我成日都有瑕疵

李克勤花名有好多,其中有「CD勤」,「零瑕疵歌手」其實哩類嘅花名會唔會成為工作負擔?「其實我成日都有瑕疵,唱幾個鐘嘅live邊有可能會無瑕疵,球員都唔會永遠有好嘅狀態啦,不過其實有哩個名都幾好,當大家標籤咗我哩個名嘅時候而我唱得唔好,樂迷會覺得我應該有病,嗰日唔多舒服,幫我諗埋個藉口。」李克勤笑言。

發表評論...