【一首歌】「吹啊吹讓這風吹」 徐小鳳《風的季節》咩年代都識唱
撰文：黃浩晉
出版：更新：
「吹啊吹／讓這風吹／哀傷通通帶走／管風裡是誰」
相信讀者們睇到上面幾句歌詞，即刻個腦自動補完播晒成首歌，冇錯！有請小鳳姐！
《風的季節》呢首歌真係經典，1978年收錄於《風雨同路》大碟，大碟中仲有《黃沙萬里》、《無奈》等金曲，相信一眾資深樂迷都一定識唱。就連已故廣東歌天后梅艷芳都係唱《風的季節》一曲躋身新秀歌唱比賽冠軍繼而進軍樂壇。
由於《風的季節》傳唱度高，不單止梅艷芳翻唱過，就連型佬孖仔組合Soler都有翻唱，將一首經典歌曲改編並不容易，但Soler改編非常到位。搖滾形式的曲風沒有影響歌曲原先的旋律，而且結他的律動非常好，展示到Soler的特色之餘亦保留到歌曲原有的味道。